ەندى تۋدى قورلاعاندار 10 ملن تەڭگە ايىپپۇل تولەيدى. بۇل تۋرالى Baq.kz حابارلادى، دەپ جازادى "ادىرنا" ۇلتتىق پورتالى.
مادەنيەت جانە سپورت ۆيتسە-ءمينيسترى نۇرعيسا داۋەشوۆ مينيسترلىكتىڭ كەڭەيتىلگەن القا وتىرىسىندا مەملەكەتتىك رامىزدەردى قورلاعانداردى جاۋاپقا تارتۋ قاتاڭداتىلعانىن ايتتى. سوزىنشە، ايىپپۇل كولەمى 3 000 اەك.
مەملەكەت باسشىسىنىڭ تاپسىرماسىنا سايكەس، قىلمىستىق كودەكستىڭ «مەملەكەتتىك رامىزدەردى قورلاۋ» تۋرالى 372-بابىنا وزگەرىستەر ەنگىزىلدى. وزگەرىستەر ناتيجەسىندە رامىزدەردى قورلاۋ دەرەگى ءۇشىن ايىپپۇل كولەمى 3 000 اەك-كە (1 اەك – 2023 جىلى 3 450 تەڭگە) ۇلعايتىلدى جانە قوعامدىق جۇمىستارعا تارتۋدىڭ ەڭ ۇزاق مەرزىمى 600-دەن 900 ساعاتقا دەيىن كوبەيتىلدى، - دەپ ايتتى داۋەشوۆ.
2023 جىلدان باستاپ 1 اەك 3 450 تەڭگە، دەمەك 3 000 اەك 10 350 000 تەڭگە بولادى.
ونىڭ سوزىنشە، بىلتىر، ياعني 2022 جىلى مەملەكەتتىك رامىزدەردىڭ 30 جىلدىعىن اتاپ وتتىك. ەلىمىزدە اتاۋلى مەرەكەگە وراي 500 مىڭنان استام ءتۇرلى ءىس-شارا ۇيىمداستىرىلدى.
مەملەكەت باسشىسىنىڭ قولداۋىمەن 2022 جىلى 4 ماۋسىمدا رەسپۋبليكا بويىنشا ساعات 10:00-دە مەملەكەتتىك ءانۇران ورىندالدى، مەملەكەت باسشىسىنىڭ قاتىسۋىمەن ەڭ بيىك تۋدى كوتەرۋ ءىس-شاراسى ءوتتى.
ەستەرىڭىزگە سالا كەتەيىك، بىلتىر 25 مامىردا الماتىدا «يرينا كايراتوۆنا» مەن Shiza كونتسەرتىندە توپ مۇشەلەرى تۋعا قۇرمەت كورسەتپەي، ساحنادا بالاعات سوزدەر ايتقان بولاتىن.
"ادىرنا" ۇلتتىق پورتالى
