قر مەملەكەتتىك كەڭەسشىسى ەرلان قارين ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ كەزەكتى وتىرىسىن وتكىزدى. بۇل تۋرالى اقوردانىڭ ءباسپاسوز قىزمەتى حابارلادى، دەپ جازادى "ادىرنا" ۇلتتىق پورتالى.
"جيىندا مەملەكەتتىك كوميسسيانىڭ 2022 جىلى اتقارعان قىزمەتىنىڭ نەگىزگى قورىتىندىلارى قارالدى. مەملەكەتتىك كوميسسيا جۇمىسىنىڭ باستى ناتيجەلەرىنىڭ ءبىرى رەتىندە ساياسي قۋعىن-سۇرگىن تاريحىنا ارنالعان ماتەريالدار مەن قۇجاتتاردىڭ 31 تومدىق جيناعىنىڭ جارىق كورگەنىن ايتۋعا بولادى. وتىرىس بارىسىندا ەڭبەكتى دايىنداعان اۆتورلاردىڭ قاتىسۋىمەن كوپتومدىقتىڭ تۇساۋكەسەر ءراسىمى ءوتتى",- دەلىنگەن اقوردا تاراتقان حابارلامادا.
كىتاپتار حح عاسىردىڭ 20-50 جىلدارىنداعى ساياسي قۋعىن-سۇرگىن قۇرباندارىنىڭ ءتۇرلى ساناتتارىنا قاتىستى بۇرىن جاريالانباعان ارحيۆ قۇجاتتارى مەن ماتەريالدارىنان قۇرالعان. مەملەكەتتىك كوميسسيانىڭ ماتەريالدارىن جارىققا شىعارۋ جۇمىسى بيىل دا بىرىڭعاي سەريا شەڭبەرىندە جالعاساتىن بولادى.
سونداي-اق، ءتيىستى مەملەكەتتىك ورگانداردىڭ باسشىلارى ارنايى جانە ۆەدومستۆولىق ارحيۆ قورلارىنداعى قۇجاتتاردى قۇپياسىزداندىرۋعا، ارحيۆ ماتەريالدارىن جۇيەلەۋگە جانە تسيفرلاندىرۋعا قاتىستى اتقارعان جۇمىستارى جايىندا باياندادى.
"ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ 2022 جىلى اتقارعان جۇمىسىنىڭ قورىتىندىسى: 1) باس پروكۋراتۋرانىڭ، ىشكى ىستەر مينيسترلىگىنىڭ جانە ۇلتتىق قاۋىپسىزدىك كوميتەتىنىڭ ارحيۆتەرىندە زەرتتەۋ جۇمىستارى جۇرگىزىلىپ، 2,5 ميلليوننان استام ماتەريالدار قۇپياسىزداندىرىلدى. 2) 311 مىڭ ادام اقتالدى. 3) 31 توم دەرەكتەر جيناعى جارىققا شىقتى. 2023 جىلى دا كوميسسيا ءوز جۇمىسىن جالعاستىرادى", - دەپ جازدى ەرلان قارين ءوزىنىڭ Instagram پاراقشاسىندا.
جيىن سوڭىندا 2023 جىلى قولعا الىناتىن باستى باعىتتار بويىنشا، عىلىمي-زەرتتەۋ جانە قۋعىن-سۇرگىن قۇرباندارىن اقتاۋ جۇمىستارىن جالعاستىرۋعا قاتىستى تاپسىرمالار بەرىلدى.
"ادىرنا" ۇلتتىق پورتالى
