قازاقستاننىڭ جوعارعى سوتى قاڭتاردىڭ 22-ءسى كۇنى ومىرلىك تۇرمە جازاسىنا كەسىلگەن 26 جاستاعى ۆلاديسلاۆ چەلاحتىڭ ءىسىن كاسساتسيالىق ينستانتسيادا قارايدى. الماتى وبلىسىنداعى "ارقانكەرگەن" شەكارا بەكەتىندە ولگەن 15 ادامنىڭ ولىمىنە "كىنالى" دەپ تانىلعان چەلاح 2012 جىلدان بەرى تۇرمەدە وتىر.
جوعارعى سوتقا بەرگەن وتىنىشىندە ۆلاديسلاۆ چەلاح سوتتان بۇۇ-نىڭ ادام قۇقىعى جونىندەگى كوميتەتتىڭ شەشىمىن ورىنداپ، ۇكىمنىڭ كۇشىن جويۋدى، قىلمىستىق ءىستى قايتا تەرگەۋگە جىبەرۋدى سۇراعان. بۇعان قوسا، قىلمىستىق قۋدالاۋ ورگاندارىن ءىس ماتەريالدارىنان سوتتالۋشىنىڭ قۇقىعىن بۇزاتىن بارلىق قۇجاتتاردى الىپ تاستاۋعا مىندەتتەۋدى وتىنگەن.
- 11 جەلتوقساندا ۆلاديسلاۆ چەلاح جوعارعى سوتقا ءوتىنىش جازىپ، 2017 جىلى 7 قاڭتاردا شىققان بۇۇ كوميتەتىنىڭ شەشىمىن ورىنداۋدى سۇراعان. 12 جەلتوقساندا ءوتىنىش وندىرىسكە قابىلداندى. بۇعان دەيىن كوميتەت قازاقستانعا قۇقىقبۇزۋشىلىقتاردى جويىپ، سوتتالۋشىنىڭ قۇقىعىن بۇزعانى ءۇشىن وتەماقى تولەۋگە كەڭەس بەرگەن ەدى. قازىر سوت ونىڭ ءىسىن قايتا قاراۋدى ۇيعارعان سياقتى. بۇل قايتا قارالايىن دەپ وتىرعان العاشقى ءىس، سوندىقتان قالاي بولاتىنىن بولجاۋ قيىن، - دەيدى ازاتتىق تىلشىسىنە ادام قۇقىقتارى جونىندەگى بيۋرونىڭ زاڭگەرى سۆەتلانا حيجنيچەنكو.
سوت قۇجاتىندا جوعارعى سوتتىڭ چەلاحقا “قۇپيا اقپاراتپەن تانىسۋعا قۇقىعى بار” كاسىبي ادۆوكات تاعايىنداعانى ايتىلادى.
2017 جىلى قاراشا ايىندا بۇۇ-نىڭ ادام قۇقىعى جونىندەگى كوميتەتى قازاقستاننىڭ ازاماتتىق جانە ساياسي قۇقىقتار تۋرالى حالىقارالىق پاكتىنىڭ 14-بابىن بۇزىپ، چەلاحتى ءوز ءىسىن ء"ادىل جانە بەيتاراپ سوتتا قاراۋ قۇقىعىنان ايىردى" دەگەن ۇيعارىم شىعارعان. كوميتەتكە شاعىمدى ادام قۇقىقتارى جونىندەگى قازاقستاندىق بيۋرو مەن ونىڭ ادۆوكاتى سەرىك سارسەنوۆ (ول 2018 جىلى ناۋرىز ايىندا قايتىس بولعان) دايىنداعان.
2012 جىلى 30 مامىردا الماتى وبلىسىنداعى "ارقانكەرگەن" شەكارا بەكەتىنىڭ ورتەنگەن ورنىنان 14 شەكاراشى مەن ءبىر قورىقشىنىڭ ءمايىتى تابىلعان. ءتىرى قالعان جالعىز شەكاراشى ۆلاديسلاۆ چەلاحتىڭ ۇستىنەن قىلمىستىق ءىس قوزعالىپ، 2012 جىلعى جەلتوقساندا سوت ونى ءومىر بويى باس بوستاندىعىنان ايىرعان.
"ازاتتىق" راديوسى
