Qazaqstannyń Joǵarǵy soty qańtardyń 22-si kúni ómirlik túrme jazasyna kesilgen 26 jastaǵy Vladıslav Chelahtyń isin kassaııalyq ınstanııada qaraıdy. Almaty oblysyndaǵy "Arqankergen" shekara beketinde ólgen 15 adamnyń ólimine "kináli" dep tanylǵan Chelah 2012 jyldan beri túrmede otyr.
Joǵarǵy sotqa bergen ótinishinde Vladıslav Chelah sottan BUU-nyń Adam quqyǵy jónindegi komıtettiń sheshimin oryndap, úkimniń kúshin joıýdy, qylmystyq isti qaıta tergeýge jiberýdi suraǵan. Buǵan qosa, qylmystyq qýdalaý organdaryn is materıaldarynan sottalýshynyń quqyǵyn buzatyn barlyq qujattardy alyp tastaýǵa mindetteýdi ótingen.
- 11 jeltoqsanda Vladıslav Chelah Joǵarǵy sotqa ótinish jazyp, 2017 jyly 7 qańtarda shyqqan BUU komıtetiniń sheshimin oryndaýdy suraǵan. 12 jeltoqsanda ótinish óndiriske qabyldandy. Buǵan deıin komıtet Qazaqstanǵa quqyqbuzýshylyqtardy joıyp, sottalýshynyń quqyǵyn buzǵany úshin ótemaqy tóleýge keńes bergen edi. Qazir sot onyń isin qaıta qaraýdy uıǵarǵan sııaqty. Bul qaıta qaralaıyn dep otyrǵan alǵashqy is, sondyqtan qalaı bolatynyn boljaý qıyn, - deıdi Azattyq tilshisine Adam quqyqtary jónindegi bıýronyń zańgeri Svetlana Hıjnıchenko.
Sot qujatynda Joǵarǵy sottyń Chelahqa “qupııa aqparatpen tanysýǵa quqyǵy bar” kásibı advokat taǵaıyndaǵany aıtylady.
2017 jyly qarasha aıynda BUU-nyń Adam quqyǵy jónindegi komıteti Qazaqstannyń Azamattyq jáne saıası quqyqtar týraly halyqaralyq paktiniń 14-babyn buzyp, Chelahty óz isin "ádil jáne beıtarap sotta qaraý quqyǵynan aıyrdy" degen uıǵarym shyǵarǵan. Komıtetke shaǵymdy Adam quqyqtary jónindegi qazaqstandyq bıýro men onyń advokaty Serik Sársenov (ol 2018 jyly naýryz aıynda qaıtys bolǵan) daıyndaǵan.
2012 jyly 30 mamyrda Almaty oblysyndaǵy "Arqankergen" shekara beketiniń órtengen ornynan 14 shekarashy men bir qoryqshynyń máıiti tabylǵan. Tiri qalǵan jalǵyz shekarashy Vladıslav Chelahtyń ústinen qylmystyq is qozǵalyp, 2012 jylǵy jeltoqsanda sot ony ómir boıy bas bostandyǵynan aıyrǵan.
"Azattyq" radıosy
