وقۋلىق اۆتورلارىنىڭ قاتەلىگىن 2-سىنىپ وقۋشىسى اشكەرە ەتتى. بۇل تۋرالى جۋرناليست دينا يمامباي فەيسبۋك پاراقشاسىنا جاريالادى، دەپ حابارلايدى “ادىرنا” ۇلتتىق پورتالى.
ايتۋىنشا، بەلگىلى اقىن قۋات ءاديستىڭ قىزى وقۋلىقتا اكەسىنىڭ ولەڭىن وزگە اقىننىڭ ولەڭى دەپ قويعانىن بايقاعان.
“وتىرىكتىڭ قۇيرىعى ءبىر-اق تۇتام” دەگەن وسى. جالپى ءبىلىم بەرەتىن مەكتەپتىڭ 2-سىنىبىنا ارنالعان “ادەبيەتتىك وقۋ كىتابىنىڭ” اۆتورلارى ب.قاباتاي، ۆ. قاليەۆا جانە ءۇ. زەينەتوللينا وقۋلىققا اقىن قۋات ءاديستىڭ ولەڭىن بەلگىلى بالالار اقىنى قاستەك بايانباەۆتىڭ اتىنان بەرگەن. قۋاتتىڭ 2-سىنىپتا وقيتىن قىزى اكەسىنىڭ ولەڭىن تانىپ، اۆتورى قاتە جازىلعانىن بايقاعان.
وقۋلىق اۆتورلارى، باسقادان ۇيالماساڭىزدار دا كىشكەنتاي وقۋشىلاردان ۇيالساڭىزدارشى!
وقۋلىققا ەنگىزىلەتىن ماتىندەردى ينتەرنەتتەگى كۇماندى دەرەككوزدەردەن الىپ قۇراستىرۋ رەپۋتاتسيالارىڭىزعا سىن!
قۋات اديس - بالالارعا ارنالعان بىرنەشە كىتاپتىڭ اۆتورى، تانىمال اقىن”،- دەپ جازدى ول.
سونداي-اق، دينا يمامباي وقۋلىق اۆتورلارىنا قازاق ادەبيەتىنىڭ قازىرگى كلاسسيگى بايبوتا قوشىم-نوعايدى كەڭەسشىلىككە شاقىرۋىنا كەڭەس بەردى.
“بالالار اقىندارى مەن جازۋشىلارىن تانىماساڭىزدار، قازاق ادەبيەتىنىڭ قازىرگى كلاسسيگى بايبوتا قوشىم-نوعايدى كەڭەسشىلىككە شاقىرىڭىزدار.
بايبوتا اعا - ون تومدىق “قازاق بالالار ادەبيەتى انتولوگياسىنىڭ” قۇراستىرۋشىسى.
- وقۋ-اعارتۋ مينيسترلىگىن ۇياتقا قالدىرعان وقۋلىق اۆتورلارى مارقۇم قاستەك بايانباەۆتىڭ وتباسىنان جانە قۋات اديستەن كەشىرىم سۇراۋى ءتيىس.
- مىنا وقۋلىق تۇگەلدەي قايتا تەكسەرىلسىن، جۇمىسىنا جاۋاپسىز اۆتورلارعا ايىپپۇل سالىنسىن. ايتپەسە وقۋلىق سالاسىنداعى بىلىق توقتامايدى.
- ساپاسىز وقۋلىق بالالاردى قازاق مەكتەبىنەن بەزدىرۋگە اكەپ سوعادى. بۇل ۇلت مەكتەبىنە جاسالىپ وتىرعان قاستاندىقپەن تەڭ”،- دەپ جازدى جۋرناليست.
اقىن قۋات اديس تە رەنىشىن جاسىرمادى.
“كەشە 2 سىنىپ وقيتىن قىزىم ء"سىزدىڭ شىن اتىڭىز قاستەك بايانباي ما؟", — دەپ سۇرايدى. تۇك تۇسىنبەي "جوق، بالام، قاستەك بايانباي قازاقتىڭ ۇلكەن اقىنى عوي", — دەيمىن مەن. قولىنداعى كىتابىن كورسەتىپ، "مىناۋ ءسىزدىڭ ولەڭىڭىز عوي. مەن ءبارىن جاتتاپ العانمىن. بىراق، مىنا جەردە سول ادامنىڭ اتى جازىلعان، سۋرەتى دە باسقا", — دەيدى قىزىم تاڭىرقاپ. قارادىم. راسىمەن، 2 سىنىپتىڭ "ادەبيەتتىك وقۋ" وقۋلىعىندا مەنىڭ "دارۋمەندەر داۋاسى" دەپ اتالاتىن ولەڭىمنىڭ ەكى شۋماعىن قاستەك بايانبايعا تەلىپ جىبەرىپتى. اۋەلدە باسقا اقىننىڭ ولەڭىن كوشىرىپ جازعانداي بولىپ قىزىمنان ىڭعايسىزدانىپ قالدىم. مۇمكىن، سايكەستىك شىعار دەيىن دەسەم، ولەڭىمنىڭ ءۇتىر، نۇكتەسىنە دەيىن تانىپ تۇرمىن. 2021 جىلى جارىق كورگەن كىتابىما ەنگەن. ءتىپتى ول كىتاپتى "دارۋمەندەر داۋاسى" دەپ تە اتاعام.
بىردەن بايبالام سالمايىن دەپ بايىپپەن قاراپ شىقتىم. اتالعان وقۋلىق بيىل، ياعني 2022 جىلى "اتامۇرا" باسپاسىنان شىعىپتى. العاشقى بەتىنە "وقۋلىق باستاۋىش ءبىلىم بەرۋ دەڭگەيىنىڭ 2-4 سىنىپتارىنا ارنالعان "ادەبيەتتىك وقۋ" ءپانىنىڭ ۇلگىلىك وقۋ باعدارلاماسىنا سايكەس دايىندالدى" دەپ جازىلىپتى”،- دەدى قۋات اديس.
سونداي-اق، ول وقۋلىق اۆتورلارىنىڭ تەكسەرىلمەگەن سايتتان الىپ، كىتاپقا جاريالاي سالاتىنىنا قاپالى.
“مۇمكىن، وسىعان ۇقساس ولەڭدەرى بار شىعار دەگەن ويمەن ۇيدەگى كىتاپحانامدا بار قاستەك بايانبايدىڭ كىتاپتارىن بىرنەشە مارتە قاراپ شىقتىم. تابا المادىم. بولماعان سوڭ گۋگلعا كىردىم. مىنە، قىزىق! bilim all, zharar سايتتارى "دارۋمەندەر داۋاسىن" تولىقتاي جاريالاپ، اۆتورىن قاستەك بايانباي دەپ كورسەتىپتى. باقسام، باقا ەكەن دەمەكشى، كىلتيپان وسى جەردە سياقتى. كىتاپتى قۇراستىرۋشىلار ولەڭدى الگى سايتتاردان الىپ، وقۋلىققا قوتارا سالعان. اۆتورىن ناقتىلاۋعا قۇلقى بولماعان نەمەسە ەرىنگەن. جاۋاپكەرشىلىك بار جۇمىستا دا بولۋى كەرەك قوي. بىراق، ۇرپاق تاربيەسى ءۇشىن قولعا العان يگىلىكتى جۇمىستا جاۋاپسىزدىق تانىتقاندارعا نە دەۋگە بولادى؟
بۇعان دەيىن دە مەكتەپ وقۋلىقتارىنداعى ورەسكەل قاتەلىكتەر ايتىلىپ، جازىلىپ كەلەدى. ايتسە دە، تىنىس بەلگىلەرى نەمەسە ارىپتىك قاتەلەر ەمەس، تۇتاس تۋىندىنىڭ اۆتورلارىن شاتاستىرعاندارىن تۇسىنە الار ەمەسپىن.
قاستەك بايانباي مەنىڭ عانا ەمەس، ءبىزدىڭ بۋىننىڭ ەڭ سۇيىكتى اقىنى، ءتاتتى ولەڭدەرىمەن تاربيەلەندىك. بالالار ادەبيەتىنىڭ كلاسسيگىنە ەكى شۋماق ولەڭىمدى قيماي وتىرعانىم جوق، تەك سونداي تۇلعانى بىزدەي پاقىردىڭ دەڭگەيىنە تۇسىرگەندەرگە ايتار ءسوزىم بولماي وتىر...”،- دەدى اقىن.
