مەملەكەتتىك قىزمەت ىستەرى اگەنتتىگىنىڭ باستاماسىمەن اۋىلدىق وكرۋگ اكىمدەرى اراسىندا «ۇزدىك اۋىل اكىمى» رەسپۋبليكالىق كونكۋرسى وتكىزىلدى، دەپ حابارلايدى «ادىرنا» ءتىلشىسى.
كونكۋرستىڭ ماقساتى — ۇزدىك اۋىل اكىمدەرىن انىقتاۋ جانە ناسيحاتتاۋ.
بايقاۋعا قاتىسۋ ءۇشىن ەلىمىزدىڭ تۇكپىر-تۇكپىرىنەن جۇزگە جۋىق اۋىلدىق وكرۋگىنىڭ اكىمدەرى ءوتىنىم بەردى. وبلىستاردىڭ اراسىندا قوستاناي وبلىسىنان 14 اكىم، سولتۇستىك قازاقستان وبلىسىنان 12 اكىم، جامبىل وبلىسىنان 12 اكىم كونكۋرسقا ءوتىنىم بەرىپ، بەلسەندىلىك تانىتتى.
كونكۋرس قورىتىندىسى بويىنشا تۇركىستان وبلىسى شاردارا اۋدانى جاۋشىقۇم اۋىلدىق وكرۋگىنىڭ اكىمى نۇرسەيتوۆ نۇرباقىت داۋلەتبەكۇلى «ۇزدىك اۋىل اكىمى» اتاعىن يەلەندى.
ەكىنشى ورىندى پاۆلودار وبلىسى ۋسپەن اۋدانى نوۆوپوكروۆسك اۋىلدىق وكرۋگىنىڭ اكىمى ۆياچەسلاۆ نيكولاەۆيچ سيمونەنكو، ءۇشىنشى ورىندى اقتوبە وبلىسى شالقار اۋدانى ايشۋاق اۋىلدىق وكرۋگىنىڭ اكىمى ورالبەك ءابشانۇلى ءابشانوۆ يە بولدى.
سونداي-اق شىعىس-قازاقستان وبلىسى ۇلان اۋدانى ابلاكەت اۋىلدىق وكرۋگىنىڭ اكىمى اگلانبەكوۆ ارىسلان ورىنباساروۆيچ – «ۇزدىك شارۋاشىل اكىم»، قاراعاندى وبلىسى نۇرا اۋدانى بارشىن اۋىلدىق وكرۋگىنىڭ اكىمى مۋحاناليەۆا زاۋرە كازانباەۆنا – «اشىق اكىم»، سولتۇستىك-قازاقستان وبلىسى اققايىڭ اۋدانى شاعالالى اۋىلدىق وكرۋگىنىڭ اكىمى دوبروميروۆا گۋلميرا ورازباەۆنا – «ۇزدىك الەۋمەتتىك جوبا» نوميناتسيالارىنىڭ يەگەرلەرى اتاندى.
بايقاۋ جەڭىمپازدارى مەن نوميناتسيا يەگەرلەرى مەملەكەتتىك قىزمەت ىستەرى اگەنتتىگى توراعاسىنىڭ قۇرمەت گراموتاسىمەن ماراپاتتالدى.
