قارجى مونيتورينگ اگەنتتىگى ميحايل كوزاچكوۆتى ۇستاعانىن مالىمدەدى، دەپ حابارلايدى “ادىرنا” ۇلتتىق پورتالى.
اگەنتتىكتىڭ ءباسپاسوز قىزمەتىنىڭ مالىمەتىنشە، ول كوسپاەۆتىڭ ۇيىمداسقان قىلمىستىق توبىنا رەيدەرلىك باسىپ الۋلار جاساۋعا كومەكتەسكەن دەگەن كۇدىككە ىلىنگەن.
اقپاراتقا سۇيەنسەك، قوسپاەۆ پەن ونىڭ سىبايلاستارى تانىمال كاسىپكەرلەردىڭ بيزنەسىن تارتىپ الۋى تەرىس قوعامدىق رەزونانس تۋدىراتىنىن ءتۇسىنىپ، كوزاچكوۆتىڭ قىزمەتتەرىن رەيدەرلىك باسىپ الۋ قۇرباندارىنا اقپاراتتىق شابۋىل جاساۋ ماقساتىندا پايدالاندى.
ءوز كەزەگىندە، كوزاچكوۆ قۇقىق قورعاۋ ورگاندارىندا كوپ جىلدىق تاجىريبەسى بار دوسى بۋرحان جانسەيىتوۆتى ءىرى كولەمدەگى سىياقىعا ۇقت مۇشەلەرىنە سىبايلاستىق جاساۋعا تارتقان.
سونداي-اق، ءوزىنىڭ بۇرىنعى بايلانىستارى ارقىلى ۇقت قاجەتتىلىكتەرى ءۇشىن، سونىمەن قاتار كەيىن جاريالاۋعا ارنالعان ايىپتايتىن اقپاراتتاردى جيناعان.
“سونىمەن قاتار، جانسەيىتوۆ كوزاچكوۆقا تەلەگرامم-كانالىن مودەراتسيالاۋعا كومەكتەستى، اتاپ ايتقاندا، ءجۋرناليستىڭ جاريالانىمدارىنىڭ استىنا ۇقت باسقا مۇشەلەرىمەن بىرىگىپ، كوممەنتاريلەر ورنالاستىرۋ ارقىلى قوعامدىق پىكىر قالىپتاستىردى.
پوستتارعا جاعىمسىز پىكىرلەر قالدىرعان جازبالاردى ءوشىرىپ، پايدالانۋشىلاردى بۇعاتتاپ وتىرعان”، - دەلىنگەن اقپاراتتا.
تەرگەۋ بارىسىندا جانسەيتوۆ پەن كوزاچكوۆتىڭ ءوز قىزمەتتىر ءۇشىن ۇقت مۇشەلەرىنەن 52 ملن تەڭگە سىياقى العانى دالەلدەنگەنى ايتىلادى.
كاسىپكەر ابدىعاپپاروۆتىڭ شەشەسى جۇنىسبەكوۆاعا تيەسىلى "ەسەنتاي سيتي" جوباسىنداعى ۇلەستى رەيدەرلىك باسىپ الۋ پيعىلىن ىسكە اسىرۋ ءۇشىن كوزاچكوۆ ابدىعاپپاروۆتىڭ بەدەلىن تۇسىرەتىن بىرقاتار ماقالالار جاريالاعان.
“بۇل رەتتە جۋرناليست "بۇقارالىق اقپارات قۇرالدارى تۋرالى" زاڭ تالاپتارىن ورەسكەل بۇزدى، ويتكەنى كەيبىر جاعدايلاردا ول كورىنەۋ جالعان مالىمەتتەردى، سونداي-اق بانكتىك، وتباسىلىق جانە باسقا دا زاڭمەن قورعالاتىن قۇپياعا قاتىستى دەرەكتەردى تاراتتى.
اعىمداعى جىلدىڭ ءساۋىر ايىندا كاسىپكەر ابدۋللاەۆ كوسپاەۆتىڭ ۇقت مۇشەسى – شالين رۋسلان تاراپىنان شىنى ىدىستار شىعاراتىن زاۋىتتى رەيدەرلىك باسىپ الۋ فاكتىسى تۋرالى جۇرتشىلىققا جۇگىندى، ولار زاڭدى مەنشىك يەسىن باسقارۋدان شەتتەتۋگە تىرىستى”، - دەپ قوستى قارجى مونيتورينگ اگەنتتىگى.
اگەنتتىكتىڭ ءباسپاسوز قىزمەتىنىڭ مالىمەتىنشە، جولعا قويىلعان سحەما بويىنشا، ۇقت مۇددەسى ءۇشىن ارەكەت ەتە وتىرىپ، كوزاچكوۆ زاۋىت يەسىنىڭ بەدەلىن تۇسىرەتىن بىرقاتار ماقالالار جاريالاعان. بۇل رەتتە الماتى وبلىسى تۇرعىندارىنىڭ الكوگول ونىمىمەن ۋلانۋى جانە جابىرلەنۋشىنىڭ قاساقانا كىسى ولتىرۋگە قاتىسى بار ەكەندىگى تۋرالى كورىنەۋ جالعان مالىمەتتەر تاراتىلدى.
2022 جىلدىڭ شىلدە ايىنىڭ باسىندا قوسپاەۆتىڭ ۇقت مۇشەلەرى قارجىلىق مونيتورينگ ورگاندارى ولاردىڭ قىلمىستىق ارەكەتتەرىن اشكەرەلەۋ بويىنشا جەدەل ءىس-شارالار مەن تەرگەۋ جۇرگىزىپ جاتقانىن قۇقىق قورعاۋ ورگاندارىنداعى دەرەككوزدەرى ارقىلى بىلگەن. جاسالعان قىلمىستارى ءۇشىن قىلمىستىق جاۋاپكەرشىلىككە تارتىلۋدان قورقىپ، ۇقت مۇشەلەرى تاناشەۆ، شالين، كوسپاەۆ ايدوس كوزاچكوۆ پەن جانسەيىتوۆتىڭ قاتىسۋىمەن ەلدوس كوسپاەۆتىڭ ۇيلەستىرۋىمەن تەرگەۋ ورگانىنىڭ بەدەلىن ءتۇسىرۋ جانە ونىڭ جۇمىسىنا كەدەرگى جاساۋ جوسپارىن ىسكە اسىرعان.
“اعىمداعى جىلدىڭ 12 شىلدەسىندە الماتى قالاسىندا جانسەيىتوۆ ۇقت بەلسەندى مۇشەسى - ايدوس كوسپاەۆقا باقىلاۋدى جۇرگىزگەن جەدەل قىزمەتكەرلەردىڭ ماشيناسىنىڭ جولىن بۇعاتتادى.
الدىن الا دايىندالعان ستسەناري بويىنشا ادۆوكاتتار مەن كوزاچكوۆ وقيعا ورنىنا كەلدى، ولار قورعاۋشىلاردى جاسىرىن باقىلاۋدى اشكەرەلەگەنى تۋرالى جالعان مالىمەتتەردى كوپشىلىككە تاراتا باستادى.
بيللينگ پەن باقىلاۋ كامەرالارىن قولدانۋ ارقىلى جەدەل ماشينانىڭ سول كۇنى نەمەسە الدىڭعى بىرنەشە كۇندە ادۆوكاتتاردىڭ ءجۇرۋ باعىتى بويىنشا مۇلدەم قيىلىسپاعانى سەنىمدى تۇردە انىقتالدى.
كوزاچكوۆ ناقتى دەرەكتەردىڭ بۇرمالانۋىمەن بايلانىستى جاعدايدى ۇقت مۇددەسى ءۇشىن قامتىپ قانا قويماي، ولاردىڭ ءىس-ارەكەتتەرىن سول جەردە ۇيلەستىردى جانە كوسپاەۆ ايدوسقا باقىلاۋدان جاسىرىنۋعا مۇمكىندىك بەردى. ناتيجەسىندە سوڭعىسى ىزدەۋگە جاريالاندى”، - دەپ جازدى اگەنتتىك.
بۇدان باسقا، كوزاچكوۆقا جانە باسقا تۇلعالارعا قاتىستى مەملەكەتتىك قۇپيالاردى قۇرايتىن مالىمەتتەردى زاڭسىز جيناۋ جانە تاراتۋ فاكتىلەرى بويىنشا قىلمىستىق ءىس تەرگەلۋدە.
قازىرگى ۋاقىتتا تەرگەۋ جالعاسۋدا، كوسپاەۆتىڭ ۇقت مۇشەلەرىنىڭ باسقا دا قىلمىستارعا قاتىسى بار-جوعى تەكسەرىلۋدە.
