تاۋەلسىزدىك كۇنى ەلوردادا قىسقى سپورت ماۋسىمى اشىلدى. وعان 300-گە تارتا قالا تۇرعىندارى مەن قوناقتارى قاتىستى، دەپ حابارلايدى ەلوردا اكىمدىگىنىڭ رەسمي سايتى.
جارىسقا ارنايى اقمولا وبلىسى، كوكشەتاۋ، ەرەيمەنتاۋ قالارىنان 120-عا جۋىق اۋەسقوي شاڭعىشىلاردا قاتىستى.
شارانىڭ اشىلۋ سالتاناتىندا ءسوز العان استانا قالاسىنىڭ دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ قاتىسۋشىلارعا ساتتىلىك تىلەپ، شاڭعى جارىسىنىڭ قاتىسۋشىلارىنا «ستارت» بەردى.
"1985 جىلى اشىلعان شاڭعىروللەر تاسجولى - سپورتشىلار ۇناتاتىن ورىن. مۇندا جازدا ۆەلوسيپەدشىلەر مەن روللەرلەر، ال قىستا شاڭعىشىلار جينالادى. ءداستۇر بويىنشا شاڭعىروللەر تاسجولىندا قىسقى ماۋسىم شاڭعى جارىسىمەن اشىلادى. بيىلعى العاشقى جارىسقا قاتىسۋشىلار اراسىندا 80-ءدى ەڭسەرگەن قاريالارىمىز بەن، 7 جاستاعى شاڭعىشىلاردا بار", - دەيدى قالالىق سپورت باسقارماسىنىڭ باسشىسى سامات جىلقىباەۆ.
سونىمەن قاتار شارا اياسىندا قالا تۇرعىندارى ءۇشىن گىر تاسىن كوتەرۋ، قول كۇرەسى، ارقان تارتىس جانە بەلبەۋ كۇرەسى سەكىلدى سپورت تۇرلەرىنەن جارىستار ۇيىمداستىرىلدى.
جىل سايىن ءداستۇرلى تۇردە وتەتىن سپورتتىق شارا مەن شاڭعى جارىسىنىڭ جەڭىمپازدارىن ءار جاس توبى بويىنشا باعالى سىيلىقتارمەن، ديپلومدارمەن جانە مەدالدارمەن ماراپاتتالدى.
