ەرەكشە باستالىپ، ۇلتتىق ءۇردىس العان وسى وقيعا مىنانداي جايتتاردى كورسەتتى.
ءبىرىنشى، بيلىك اياق استى وقيعالارعا دايىن ەمەس.
ەكىنشى، تاۋەلسىز جۋرناليستيكا تۇگىلى، ۇلتتىق باعىتتاعى باق جوق. كەرىسىنشە، ۇلتقا قارسى سويلەيتىن باۋىرى سۋىق بلوگەرلەر بار ەكەنى تانىلدى.
ءۇشىنشى، اسسامبلەيا قاۋقارسىز، قاجەتسىز قۇرىلىم.
ءتورتىنشى، بيلىك ىشىندە ۇلت ءسوزىن سويلەيتىن ەشكىم جوق.
بۇنىڭ ءبارى داۋسىز اكسيوما. ەندى بۇل وقيعا نەدەن باستاۋ الۋى مۇمكىن، نەگە بۇلاي بولدى دەسەك... قاراعاندى الدە ءبىر توقىراۋعا، ەستاندى تاجىربيەگە ۇشىراعانداي. ىڭعايسىز جاعدايدا باستالعان ءىىم اكادەمياسىنداعى "مالىمدەمە" ءىىم ىشىندەگى كلان سوعىسىنىڭ كورىنىسى سەكىلدى. "ەجەلگى رۇمداعى" جانجال سونىڭ باسقاشا جالعاسىنداي. ەسكى كەڭەس كەزىندە، بۇگىنگى قازاقستاندا ۇقك مەن ءىىم اراسىنداعى تەكە-تىرەس بىزگە ءمالىم، بۇنىڭ اياعى ءاندروپوۆتىڭ بيلىككە كەلۋىمەن بىتكەن. تۋرا وسىنداي جايتتارمەن پۋتين دە پرەزيدەنتكە اينالدى.
ال ءبىزدىڭ ۇقك باسشىسى ەكى مارتە وكىمەتتى باسقارعانى بارىمىزگە بەلگىلى. نەمەسە بۇل نيعاماتۋلليننەن قالعان "قازىنالاردى" ءبولىسۋ. كۇدىكتىلەر اراسىندا "وعلىلاردىڭ" بولۋى ودان كەيىن جوعالىپ كەتۋى، قىرىق ءبىر قۇمالاقتى بىرەۋلەردىڭ اسىعا ارالاستىرىپ جاتقانىن كورسەتتى. نەمەسە سىرتقى كۇشتەر- قازاق دالاسىن ءازىربايجان مەن ارمەن اراسىنداعى مايدان ارەناسىنا اينالدىرماق! وندا ەۋرازيالىق وداق قازاق بيلىگىنىڭ قولىن ارى بايلاي تۇسەدى. الدە ءبىر كۇشتەر-ارمەن مەن ساقشىلاردىڭ سويلەسكەن اۋديوجازبالارىن توگىپ، قۇيۋدا. وسى ارقىلى قۇقىق قورعاۋ ورگاندارىنىڭ قىلمىسىن اشىپ، رەستوران ەگەلەرىن دە كورسەتۋدە.بۇنداي مالىمەتتەر جاي شاشىلمايدى، قاراپايىم ەل بىلمەس تەندەر ماسەلەلەرى دە ايتىلىپ قالدى. بىراق قازاق اتالمىش سىناقتان اداسپاي ءوتتى! بىزگە تەمىردەي ءتارتىپ كەرەك، جونگە سالۋ كەرەك دەگەن بايلاۋلى بلوگشىلەر شىعارى انىق. بۇدان ءارى ايىلدى تارتار بولسا اتتان قۇلايدى بۇل جۇيە.
قاراعاندى- جولايىرىقتا تۇرعانىمىزدى كورسەتتى. جاۋلاردىڭ جار استىندا ەمەس، جانىڭدا جاتقانىن ايتتى-قاراعاندى. بوزداعىڭنىڭ باۋىزدالىپ، قار ۇستىندە قاراۋسىز قالاتىنىن دا ەسكەرتتى-قاراعاندى. قاھارلى قىستان دا سۋىق ەر قايراتى، ەل قايراتى بار ەكەنىن پاش ەتتى-قاراعاندى...
سەرىك ەلىكباي
"ادىرنا" ۇلتتىق پورتالى
