استانادا شەتەلدىك كولىكتەردى زاڭسىز تىركەگەن حقكو قىزمەتكەرلەرى مەن پوليتسەيلەر ۇستالدى. بۇل تۋرالى انتيكوردىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«قىلمىستىق توپ وسى جىلدىڭ قاڭتار ايىنان باستاپ ازاماتتاردى شەتەلدىك اۆتوكولىكتەردى ەسەپكە قويۋدىڭ زاڭدىلىعىنا قاتىستى الداۋ ارقىلى ءوز قىزمەتتەرىن ۇسىنا وتىرىپ، ولاردىڭ اقشالاي قاراجاتىن ۇرلاپ، 486 كولىك قۇرالىن زاڭسىز تىركەگەنى انىقتالدى.
ءاربىر اۆتوكولىك ءۇشىن زاڭسىز قىزمەتتىڭ قۇنى 400 مىڭ تەڭگەدەن 1,6 ملن تەڭگەگە دەيىن بولعان»،—دەدى ۆەدومستۆو.
قاجەتتى اقشانى العاننان كەيىن كۇدىكتىلەر اۆتوكولىكتەردى ساتىپ الۋ-ساتۋ مامىلەلەرىنىڭ جازباشا فورماسىن، مەملەكەتتىك نومىرلەر مەن كولىك قۇرالدارىن تىركەۋ تۋرالى كۋالىكتەردى دايىنداعانى ءۇشىن مەملەكەتتىك باج تولەنگەنى تۋرالى تۇبىرتەكتەردى قولدان جاساعان.
ۇقت قىزمەتى، ونىڭ ىشىندە ىشكى ىستەر ورگاندارىنىڭ مەملەكەتتىك اۆتوينسپەكتورلارىنىڭ «Web-مودۋل» سەرۆيستىك ورتالىعى» اقپاراتتىق جۇيەسىندە بۇرىن كادەگە جاراتىلعان اۆتوماشينالار تۋرالى مالىمەتتەردى قاساقانا زاڭسىز جويۋى جانە ولاردىڭ ورنىنا جاڭادان اكەلىنگەن اۆتوموبيلدەردىڭ مالىمەتتەرىن ەنگىزۋ سالدارىنان جۇزەگە اسقان. سوتتىڭ سانكتسياسىمەن ءتورت پوليتسيا قىزمەتكەرى قاماۋعا الىندى.
«بۇگىنگى كۇنى ءىس بويىنشا قىلمىستىق توپتىڭ تاعى 4 بەلسەندى قاتىسۋشىسى، ونىڭ ىشىندە استانا قالاسى بويىنشا №2 ارنايى حقكو باسشىسى ۇستالدى. تەرگەۋ جالعاسۋدا»،—دەپ تولىقتىردى انتيكوردىڭ ءباسپاسوز قىزمەتى.
