Reseıdiń Qazaqstandaǵy Tótenshe jáne Ókiletti Elshisi Alekseı Borodavkın sputnik.kz tilshisine bergen suhbatynda Qazaqstanda orysfobııa men ekstremızmniń damyp kele jatqanyn aıtty, dep habarlaıdy “Adyrna” ulttyq portaly.
Ol qazaq qoǵamyn ultshyl jáne radıkaldy urandar jaýlap aldy dep esepteıdi.
“Qazaqstandaǵy ultshyldyq pen radıkaldyq tendenııalardyń barǵan saıyn aıqyn baıqalyp jatqanyna ókinishpen aıta alamyn jáne alańdaımyn. Internette radıkaldy ultshyldar múldem qabyldanbaıtyn talaptar, urandar jáne t.b. usynatyn beınerolıkterge toly. Onyń ústine bul urandar rýsofobtyq”, – dedi elshi.
Sondaı-aq, Borodavkın prezıdent Toqaevtyń ulyqtaý rásimi kezinde qoǵamdaǵy alaýyzdyqqa jáne halyq birligine nuqsan keltirýge baǵyttalǵan arandatýshylyq áreketterdiń jolyn kesetinin jarııalaǵanyn atap ótti. Ol budan bylaı el basshylyǵy qazaq qoǵamyndaǵy ultshyldyq pen radıkaldyq sezimdi azaıtý sharalaryn qolǵa alady dep kútedi.
“Qaıtalap aıtamyn, qazir prezıdent bergen kúshti mandatpen ekstremıstik ultshyldyq sózderdiń barlyq túrlerin aýyzdyqtaýǵa baǵyttalǵan qatań sharalar júzege asyrylady. Bizden surasa, kómektesemiz”, – dedi ol.
Bul rette Tótenshe Elshi qańtar oqıǵasy kezinde UQShU arqyly bitimgershilik kontıngentiniń engizilýi eldegi tártipti tez arada qalpyna keltirýge kómekteskenin eske saldy. Ol Qazaqstan halqyna óte jyldam ári tıimdi kómek úshin alǵys bildiretinin atap ótti.
