ارقانىڭ ارىستان جۇرەكتى ازاماتى قاقاعان قىستا سۋعا باتقان بىرنەشە ادامدى قيىندىقتان تايسالماي، كوزسىز ەرلىكپەن قۇتقارىپ قالدى. ونىڭ شاربولات رۋحتى بولمىسىنا باس ءيىپ، باتاسىن بەرىپ جاتقانداردىڭ قاراسى قالىڭ. قاسىمىزدا جۇرگەن قاھارمان ورازالىنىڭ ايرىقشا حيكاياسىن جۋرناليست نۇرلىحان قالقامان كوپشىلىككە پاش ەتتى. بۇل جايلى “ادىرنا” ۇلتتىق پورتالى حابارلايدى.
جۋرناليست نۇرلىحان قالقامان جول-ساپاردا بولعان جارقىن ەرلىك پەن ورلىك وقيعاسىن تومەندەگىدەي سۋرەتتەيدى:
- مىنا جىگىت بۇگىن كوپتىڭ قولىنان كەلمەيتىن ەرلىك جاسادى. ىزعارى بەت قاراتپايتىن قاقاعان ايازدى مۇزداي سۋعا ءۇش رەت سۇڭگىپ، بىرنەشە ادامدى تۋرا كەلگەن اجالدان اراشالاپ قالعان. وقيعا بىلاي بولعان عوي، تاڭەرتەڭ ءبىر توپ ادام تاكسيمەن عابيدەن مۇستافين اۋىلىنا قاراي جولعا شىعادى. كولىكتە اياعى اۋىر كەلىنشەك، بەس جاستاعى قىز جانە ءالى توستەن شىقپاعان نارەستە بولعان. اينالما جولدىڭ ساپاسى تىم تومەن. جۇرت قىس تۇسكەندە نۇرا وزەنىنىڭ ۇستىمەن تۋرا ءجۇرۋدى ادەتكە اينالدىرعالى قاي زامان. تاكسيدىڭ شوپىرى دا سول ادەتكە سالىپ، مۇزعا شىعادى. بىراق، جول ورتاسىنا كەلگەندە مۇز شىتىناپ، كولىك سۋعا كەتكەن. سول كەزدە الدىڭعى ورىندا وتىرعان ورازالى اسىلحانوۆ دەرەۋ قاۋىپسىزدىك بەلبەۋىن شەشىپ، اياعى اۋىر كەلىنشەكتى قۇتقارىپ قالادى. ارتىنشا قايىرا سۋعا سۇڭگىپ، ەكىنشى كەلىنشەكتى الىپ شىعادى. كەيىن ءۇشىنشى رەت مۇزداي سۋعا سۇڭگىپ، ءسابي مەن بەس جاستاعى قىزدى جاعالاۋعا جەتكىزىپ، ەسىنەن تانىپ قالعان قىزعا العاشقى كومەكتى دە كورسەتكەن.
كەيىننەن جۋرناليست وتانى ءۇشىن وتقا ءتۇسىپ، ۇلكەن شاڭىراعىنىڭ اماندىعى ءۇشىن شوق باسۋعا دايار ازاماتتىڭ بۇعان دەيىنگى ەرلىگىن بايان ەتەدى:
- ورازالىنىڭ ەرلىگى بۇل عانا ەمەس. اناسىنىڭ ايتۋىنشا، جازدا نۇراعا باتىپ بارا جاتقان ەكى قىزدى قۇتقارىپ قالىپتى. ءوزى اسكەردەن قايتقالى كوپ بولا قويماپتى. قۇتقارۋ قىزمەتىنە جۇمىسقا تۇرعىسى كەلىپ، ورنالاسا الماي ءجۇر ەكەن... وسىنداي جىگىتتەر باراتىن-اق جەر عوي، شىركىن...
قالىڭ وقىرمان ورازالىنىڭ جولىنا جوق بىتپەي، مەرەي-مارتەبەسىگىڭ ۇستەم بولۋىنا تىلەكتەستىك تانىتىپ جاتىر. حالقى ازاماتتىڭ دىتتەگەن ماقساتىنا جەتىپ، ءسوزسىز، قۇتقارۋ قىزمەتىنىڭ مامانى اتانارىنا دا سەنىمدى.
جازبا سوڭىندا:
“وسىنداي جىگىتتى تاربيەلەپ وتىرعان اتا-اناسىنا مىڭ العىس! ناعىز باتىر وسىنداي بولادى. باقىتتى بولسىن، ارمانى ورىندالسىن!”،
“قۇتقارۋ قىزىمەتىنە ورنالاسۋىنا لايىق، باتىل دا باتىر جىگىت، امان ءجۇر، اينالايىن!”،
“وتقا كۇيمەيتىن، سۋعا دا باتپايتىن وسىنداي ەر-جىگىتتەر قازاقتا كوپ قوي، شىركىن. اتتەڭ، ونى باعالايتىن مەملەكەت بولماي تۇر”،
“قازاقتىڭ جىگىتتەرى - مىقتى! كەيبىر قىزدار سولاردى مەنسىنبەي، قازاقشا سويلەگەنىن ۇناتپاي شەتكە كەتىپ جاتىر. ءبىر كەم دۇنيە دەگەن وسى” دەپ جازدى تىلەۋقور وقىرمان قاۋىم.
“ادىرنا” ۇلتتىق پورتالى
