“Beıbit kúnniń batyry!”. Qazaq jigiti kóptiń júregi daýalaı bermeıtin erlik jasady

2451
Adyrna.kz Telegram

Arqanyń arystan júrekti azamaty qaqaǵan qysta sýǵa batqan birneshe adamdy qıyndyqtan taısalmaı, kózsiz erlikpen qutqaryp qaldy. Onyń sharbolat rýhty bolmysyna bas ıip, batasyn berip jatqandardyń qarasy qalyń. Qasymyzda júrgen qaharman Orazalynyń aıryqsha hıkaıasyn jýrnalıst Nurlyhan Qalqaman kópshilikke pash etti. Bul jaıly “Adyrna” ulttyq portaly habarlaıdy.

Jýrnalıst Nurlyhan Qalqaman jol-saparda bolǵan jarqyn erlik pen órlik oqıǵasyn tómendegideı sýretteıdi:

- Myna jigit búgin kóptiń qolynan kelmeıtin erlik jasady. Yzǵary bet qaratpaıtyn qaqaǵan aıazdy muzdaı sýǵa úsh ret súńgip, birneshe adamdy týra kelgen ajaldan arashalap qalǵan. Oqıǵa bylaı bolǵan ǵoı, tańerteń bir top adam taksımen Ǵabıden Mustafın aýylyna qaraı jolǵa shyǵady. Kólikte aıaǵy aýyr kelinshek, bes jastaǵy qyz jáne áli tósten shyqpaǵan náreste bolǵan. Aınalma joldyń sapasy tym tómen. Jurt qys túskende Nura ózeniniń ústimen týra júrýdi ádetke aınaldyrǵaly qaı zaman. Taksıdiń shopyry da sol ádetke salyp, muzǵa shyǵady. Biraq, jol ortasyna kelgende muz shytynap, kólik sýǵa ketken. Sol kezde aldyńǵy orynda otyrǵan Orazaly Asylhanov dereý qaýipsizdik belbeýin sheship, aıaǵy aýyr kelinshekti qutqaryp qalady. Artynsha qaıyra sýǵa súńgip, ekinshi kelinshekti alyp shyǵady. Keıin úshinshi ret muzdaı sýǵa súńgip, sábı men bes jastaǵy qyzdy jaǵalaýǵa jetkizip, esinen tanyp qalǵan qyzǵa alǵashqy kómekti de kórsetken.

Keıinnen jýrnalıst Otany úshin otqa túsip, úlken shańyraǵynyń amandyǵy úshin shoq basýǵa daıar azamattyń buǵan deıingi erligin baıan etedi:

- Orazalynyń erligi bul ǵana emes. Anasynyń aıtýynsha, jazda Nuraǵa batyp bara jatqan eki qyzdy qutqaryp qalypty. Ózi áskerden qaıtqaly kóp bola qoımapty. Qutqarý qyzmetine jumysqa turǵysy kelip, ornalasa almaı júr eken... Osyndaı jigitter baratyn-aq jer ǵoı, shirkin...

Qalyń oqyrman Orazalynyń jolyna joq bitpeı, mereı-mártebesigiń ústem bolýyna tilektestik tanytyp jatyr. Halqy azamattyń dittegen maqsatyna jetip, sózsiz, qutqarý qyzmetiniń mamany atanaryna da senimdi.

Jazba sońynda:

“Osyndaı jigitti tárbıelep otyrǵan ata-anasyna myń alǵys! Naǵyz batyr osyndaı bolady. Baqytty bolsyn, armany oryndalsyn!”,

“Qutqarý qyzymetine ornalasýyna laıyq, batyl da batyr jigit, aman júr, aınalaıyn!”,

“Otqa kúımeıtin, sýǵa da batpaıtyn osyndaı Er-jigitter qazaqta kóp qoı, shirkin. Átteń, ony baǵalaıtyn memleket bolmaı tur”,

“Qazaqtyń jigitteri - myqty! Keıbir qyzdar solardy mensinbeı, qazaqsha sóılegenin unatpaı shetke ketip jatyr. Bir kem dúnıe degen osy” dep jazdy tileýqor oqyrman qaýym.

“Adyrna” ulttyq portaly

Pikirler