مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىندا قازاقستاننىڭ ەڭبەك سىڭىرگەن ءارتيسى، «قۇرمەت»، «پاراسات» وردەندەرىنىڭ يەگەرى عازيزا ابدىنابيەۆانىڭ 70 جاسقا تولۋ مەرەيتويىنا ارنالعان «عازيزانىڭ سىرلى الەمى» اتتى مەرەيتويلىق-شىعارماشىلىق كەشى ءوتتى.
بالالىق شاقتىڭ ەستەلىكتەرىن بايانداۋدان باستالعان سىرلى كەشتە جىلىلىق پەن مەيىرىمنىڭ، سۇلۋلىق پەن پاراساتتىلىقتىڭ، تالانت پەن ەڭبەكقورلىقتىڭ ەتالونى عازيزا ابدىنابيەۆا ساحنادا سانىمەن، ەركەلىگىمەن ءوز كورەرمەنىنە ەسەپ بەرگەندەي. «عازيزانىڭ سىرلى الەمىنە» ءارتيستىڭ ارىپتەستەرى، ونەردەگى اعا-اپكەلەرى، شاكىرتتەرى جانە وزگە دە ونەرسۇيەر قاۋىم جينالدى.
«سوناۋ سىرداريانىڭ جاعاسىندا جالاڭاياق جۇگىرىپ جۇرگەنىم ويعا ورالادى. اكە-شەشەمنىڭ ساناما قۇيعان ساۋلەسى، كوڭىل تۇكپىرىندە قالعان ادەمى اسەرلەر ءومىر بويى العا جەتەلەپ كەلەدى. بۇل دا مەنىڭ باقىتتى ساتتەرىم شىعار»، – دەيدى مەرەيتوي يەسى. سونداي-اق، ءوزى ايتقان، ونەر ادامىنا كەرەك – ادالدىق پەن تازالىقتىڭ دا يەسى – ءوزى. ءوزىنىڭ رەجيسسەرىن تاپقان، بيىگىن باعىندىرعان، ءوز دەڭگەيىن الاسارتپاعان اكتەر – باقىتتى.
70 جاس – 70 اسۋ ەمەس پە؟!. اسۋلار مەن بەلدەردەن ءوتىپ، ءوز شىعارماشىلىعىنا ەسەپ بەرگەن اكتريسا رەسپۋبليكالىق جانە حالىقارالىق تەاتر فەستيۆالدەرىنىڭ بىرنەشە مارتە جۇلدەگەرى، كورەرمەن قاۋىمعا رولدەرىنىڭ شىنايىلىعى ارقىلى تانىلعان، تەاتر ساحناسىندا الەمدىك كلاسسيكا مەن زاماناۋي دراماتۋرگيادا 50-دەن استام وبرازداردى سومداعان.
الماتى مەملەكەتتىك قۇرمانعازى اتىنداعى ونەر ينستيتۋتى، تەاتر فاكۋلتەتىنىڭ اكتەر ءبولىمىن بىتىرگەننەن كەيىن، عابيت مۇسىرەپوۆ اتىنداعى بالالار مەن جاسوسپىرىمدەر تەاترىنان ەڭبەك جولىن باستاعان ونەر يەسى – 1993 جىلدان بۇگىنگى كۇنگە دەيىن مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىندا تالماي ەڭبەك ەتىپ كەلەدى. شيرەك عاسىر عۇمىرىن اكەمتەاترىنا ارناعان اكتريسا ساحناداعى ءاربىر رولدەرى ارقىلى كوپشىلىكتىڭ كوڭىلىنە جىلۋ ۇيالاتادى.
گۇلىم رىسقۇل
