Muhtar Áýezov atyndaǵy Qazaq Memlekettik akademııalyq drama teatrynda Qazaqstannyń eńbek sińirgen artısi, «Qurmet», «Parasat» ordenderiniń ıegeri Ǵazıza Ábdinábıevanyń 70 jasqa tolý mereıtoıyna arnalǵan «Ǵazızanyń syrly álemi» atty mereıtoılyq-shyǵarmashylyq keshi ótti.
Balalyq shaqtyń estelikterin baıandaýdan bastalǵan syrly keshte jylylyq pen meıirimniń, sulýlyq pen parasattylyqtyń, talant pen eńbekqorlyqtyń etalony Ǵazıza Ábdinábıeva sahnada sánimen, erkeligimen óz kórermenine esep bergendeı. «Ǵazızanyń syrly álemine» artıstiń áriptesteri, ónerdegi aǵa-ápkeleri, shákirtteri jáne ózge de ónersúıer qaýym jınaldy.
«Sonaý Syrdarııanyń jaǵasynda jalańaıaq júgirip júrgenim oıǵa oralady. Áke-sheshemniń sanama quıǵan sáýlesi, kóńil túkpirinde qalǵan ádemi áserler ómir boıy alǵa jetelep keledi. Bul da meniń baqytty sátterim shyǵar», – deıdi mereıtoı ıesi. Sondaı-aq, ózi aıtqan, óner adamyna kerek – adaldyq pen tazalyqtyń da ıesi – ózi. Óziniń rejısserin tapqan, bıigin baǵyndyrǵan, óz deńgeıin alasartpaǵan akter – baqytty.
70 jas – 70 asý emes pe?!. Asýlar men belderden ótip, óz shyǵarmashylyǵyna esep bergen aktrısa Respýblıkalyq jáne Halyqaralyq teatr festıvalderiniń birneshe márte júldegeri, kórermen qaýymǵa rólderiniń shynaıylyǵy arqyly tanylǵan, teatr sahnasynda álemdik klassıka men zamanaýı dramatýrgııada 50-den astam obrazdardy somdaǵan.
Almaty Memlekettik Qurmanǵazy atyndaǵy Óner ınstıtýty, teatr fakýltetiniń akter bólimin bitirgennen keıin, Ǵabıt Músirepov atyndaǵy Balalar men jasóspirimder teatrynan eńbek jolyn bastaǵan óner ıesi – 1993 jyldan búgingi kúnge deıin Muhtar Áýezov atyndaǵy Qazaq Memlekettik akademııalyq drama teatrynda talmaı eńbek etip keledi. Shırek ǵasyr ǵumyryn Ákemteatryna arnaǵan aktrısa sahnadaǵy árbir rólderi arqyly kópshiliktiń kóńiline jylý uıalatady.
Gúlim RYSQUL
