زاڭگەر ايگۇل ورىنبەك رەسەيلىك جازارمان، ارانداتۋشى الەكس لەسسيدىڭ سوزىنە بولا دۇرلىككەن ازاماتتارعا ۇندەۋ جولداپ، قازاق مەملەكەتىن دامىتۋدىڭ ناقتى جولىن ۇسىندى. اۆتوردىڭ پايىمداۋىنشا، قازاق ەر-ازاماتتارى قىزدارىن قىزعىشتاي قورىعانى سەكىلدى جەمقور جۇيەمەن دە الىسۋى قاجەت. ەلىن دامىتۋ جولىندا ينتەللەكتۋالدى كۇش-جىگەرىن، تەحنوكراتيالىق قابىلەت-قارىمىن سارپ ەتكەنى دۇرىس. سوندا عانا قوعامدا ىلگەرلەۋ بولادى.
- قۇرانمەن جۇرەتىن ەلدىڭ ەركەكتەرى - بيىك-بيىك عيماراتتار سالىپ، ەلىن دامىعان ەلدەرىنىڭ قاتارىنان ءبىر-اق شىعارعان! مويىنداۋ كەرەك، بۇكىل الەمنىڭ الدىڭعى قاتارلى وزىق كومپانيالارى وسى ەلدە! بۇل ەل سەنىڭ دىنىڭە، كيىمىڭە قاراپ تۇرعان جوق، مەملەكەتكە قوساتىن ۇلەسىڭ ياعني ينۆەستيتسياڭ مەن ميىڭا مۇقتاج! ءتىپتى اللانىڭ ءۇيى بولىپ سانالاتىن مەشىتكە دە باسقا ءدىن وكىلدەرىن كىرگىزىپ اقشا تاۋىپ وتىر! - دەپ باستايدى ءوز جازباسىنىڭ بەتاشارىن زاڭگەر.
كەيىننەن اۆتور قازاق ەركەكتەرىنىڭ زامان تالابىنا ساي سىن-cيپاتىن ايشىقتاۋعا ويىسادى. ونىڭ پىكىرىنشە، ناعىز قازاق ازاماتى - ءبىلىم-بىلىكتىلىگى كەلىسكەن تۇلعا.
- ال ءبىزدىڭ ەركەكتەر شە؟ قىزداردىڭ كيىمىمەن، ودان قالسا وزىڭمەن الىسىپ، سالعىلاسىپ ۇرسىپ، ەڭ سوڭىندا جالا جابۋدان اسا الماي كەلەدى! قازاقتىڭ ەركەكتەرى - مىقتى بولسا، قازاقتىڭ قىزدارىمەن ەمەس، مىنا جەمقورلىق جايلاعان “ەسكى جۇيەمەن” الىسار ەدى! ال ءبىزدىڭ جىگىتتەر - ادىلەتسىزدىكپەن كۇرەسىپ جۇرگەن قىزدارمەن عانا كۇرەسۋگە شامالارى جەتىپ، “مىقتىمىز” دەپ وتىر ازىرگە! سوندىقتان عوي… نازىك جاندى قىز رەتىندە ادىلەتسىزدىك جايلاعان جۇيەمەن كۇشىمنىڭ جەتكەنىنشە كۇرەسىپ ءجۇرمىن! كەيدە وسىنىڭ ءبارى - ماعان نە كەرەك دەپ، قولىمدى ءبىر-اق سىلتەگىم كەلەدى… بىراق، “ەسكى جۇيەنى” ءتورت اياقتاپ قولدايتىن جاعىمپاز ەركەكتەردى كورگەندە ، نامىستان ورتەنىپ كەتەمىن! ەلىمىزدىڭ ەرتەڭى ءۇشىن ءسال بولسادا ۇلەسىم بولسىن دەپ، كۇرەسكە شىعامىن! و قۇدايىم، قازاقتىڭ ەركەكتەرى لەسليگە قارسى شىققانداي، جەمقورلىق جايلاعان “ەسكى جۇيەمەن” دە وسىلاي اشىق كۇرەسسە عوي! انشەيىندە ءۇنسىز وتىراتىن مۇحامەدجان تازابەك، ءتىپتى قىزدارىمىزدىڭ ارىن قورعاعان “كەيىپپەن” ۆيدەو-ۇندەۋ ءتۇسىرىپتى! سول مۇحامەدجان قازاق قىزدارى “ناسكيشە” تالاق قۇرباندارى بولىپ جاتقاندا، نەگە وسىلاي ۆيدەسىمەن ۇندەۋ جولدامادى ەكەن؟! الدە قازاقتىڭ جىگىتتەرىنە قازاقتىڭ قىزدارىن قورلاي بەرۋگە بولادى، ال باسقالارعا بولمايدى ما؟! اعالارى ميللياردتاعان قارجىلاردى شەتەل اسىرىپ، ەلدى توناپ جاتقاندا - نەگە وسىلاي ۆيدەو ۇندەۋ جاسامادى؟!ەندى كەلىپ قىزداردىڭ ارى قورعاپ قالىپتى-مىس! قىزداردىڭ ارىن قورعاعىڭ كەلسە - ەڭ الدىمەن، ءوز ەلىڭدى جەمقورلىقتان تازالا! جەمقورلىعى تازارعان ەلدىڭ - قىزدارى دا، ولاردىڭ ارى مەن نامىسى دا تازا بولادى! مەنى لەسيلي دەگەننىڭ ۆيدەوسىنا بەلگىلەپ، “نەگە ءۇن قاتپاي وتىرسىڭ، ءالىڭ تەك حادجاپپەن كۇرەسۋگە جەتە مە؟”،-دەپ تەگتەي بەرۋدىڭ ەش قاجەتى جوق! بۇل كەزەكتى ساياسي پروۆاكاتسيا، ءيا ارانداتۋشىلىق! بۇل دەگەن - سايلاۋ الدىندا حالىقتىڭ اراسىندا الاۋىزدىق تۋدىرۋ ءۇشىن جاسالىپ جاتقان “بىلىق-دۇنيە”! قازاق قىزدارى - اقىماق ەمەس، كىم كورىنگە ەتەگىن اشىپ جاتا بەرەتىن! - دەپ ءوزىنىڭ بولاتتاي بەرىك ويىن تۇيىندەدى ايگۇل ورىنبەك.
"ادىرنا" ۇلتتىق پورتالى
