الماتىدا زاڭسىز ويىن بيزنەسى بويىنشا 5 قىلمىستىق ءىس تىركەلدى. بۇل تۋرالى وڭىرلىك كوممۋنيكاتسيالار قىزمەتىنىڭ بريفينگىندە الماتى قالاسى بويىنشا ەكونوميكالىق تەرگەپ-تەكسەرۋ دەپارتامەنتىنىڭ تەرگەۋ باسقارماسى باسشىسى ساكەن قوندىباەۆ مالىمدەدى، دەپ حابارلايدى “ادىرنا” ۇلتتىق پورتالى.
ساكەن قوندىباەۆ ەكونوميكالىق تەرگەۋ دەپارتامەنتىنىڭ باسىم مىندەتتەرىنىڭ ءبىرى زاڭسىز ويىن بيزنەسىمەن كۇرەس ەكەنىن اتاپ ءوتتى.
«زاڭنىڭ 11-بابىنا سايكەس كازينو مەن ويىن اۆتوماتتارىنىڭ زالدارىن الماتى وبلىسىندا (قاپشاعاي) جانە اقمولا وبلىسىندا (ششۋچە اۋدانى) ورنالاستىرۋعا بولادى. باسقا جەرلەردە اشۋ زاڭسىز دەپ تانىلادى»، - دەدى ول.
سونداي-اق، زاڭسىز جۇمىس ىستەگەن 4 ونلاين كازينو مەن ءبىر ويىن زالى جابىلدى.
«بىلتىر زاڭسىز قۇمار ويىن ۇيىمداستىرۋ ءىسى بويىنشا 14 فاكتى انىقتالدى. ۇيىمداستىرۋشىلار قىلمىستىق جاۋاپكەرشىلىككە تارتىلدى»، - دەيدى ەكونوميكالىق تەرگەپ-تەكسەرۋ دەپارتامەنتىنىڭ باسشىسى.
ول سالا ماماندارى قازىر مەملەكەت باسشىسى قول قويعان جاڭا زاڭ اياسىندا جۇمىستار جۇرگىزىپ جاتقانىن جەتكىزدى.
ماسەلەن، قىركۇيەكتەن باستاپ بۋكمەكەرلەر مەن توتاليزاتورلاردى جارنامالاۋعا رەسمي تۇردە تىيىم سالىنادى. ولار تەك سپورت عيماراتتارىندا، سپورتشىلار كيىمى مەن حالىقارالىق جارىستاردا عانا جارناما جاساي الادى. بىراق 21 جاسقا تولماعاندار، بورىشكەرلەر، مەملەكەتتىك، اسكەري جانە قۇقىق قورعاۋ ورگاندارىنىڭ قىزمەتكەرلەرى مەن بيۋدجەتتىك كومپانيا باسشىلارى ءباس تىگە المايدى.
«لوتەرەيا قىزمەتىن رەتتەۋ تەتىكتەرى جاڭارتىلعان. ناقتىراق ايتقاندا، تۇرعىن ۇيلەردە، جاتاقحانالاردا، مادەني ۇيىمداردىڭ عيماراتتارى مەن الەۋمەتتىك نىسانداردا، ءبىلىم بەرۋ، دەنساۋلىق ساقتاۋ سونداي اق 100 مەتر قاشىقتىقتا لوتەرەيا بيلەتتەرىن تاراتۋعا جانە لوتەرەيا تەرمينالدارىن ورناتۋعا تىيىم سالىنعان»، - دەدى ول.
