Prezıdent Qasym-Jomart Toqaev óziniń « Ádiletti memleket. Birtutas ult. Berekeli qoǵam» atty Qazaqstan Halqyna Joldaýynda: «Halyq qatysatyn bıýdjet» jobasy tıimdi iske asyrylyp jatyr. Onyń aýqymyn keńeıtip, jobaǵa aýdandyq mańyzy bar qalalar men aýyldardy tartý kerek. Turǵyn-úı kommýnaldyq sharýashylyǵy qarjysynyń keminde 10 paıyzy qaıda jumsalatynyn qoǵamnyń ózi aıqyndaýǵa tıis. Osy aıtylǵan máselelerdi tıimdi júzege asyrý úshin jańa Bıýdjet kodeksin qabyldaý qajet, dep aıtqan bolatyn.
Búgingi kúni Almatynyń Almaly aýdanynda atalǵan jobaǵa basym nazar aýdarylýda. Qýantarlyǵy sol turǵyndarda at salysyp, óz usynystaryn berý ústinde. Máselen, bıyl almalylyq turǵyndardan 42 aýlany abattandyrýǵa ótinim kelip túsken. Tizimdegi meken-jaılardyń basym kópshiligi biraz jyldan beri jóndeý kórmepti. Eski turǵyn úı aýlalaryna jergilikti ákimdik sońǵy jyldary kóńil bóle bastaǵan. Nátıjesinde balalar oınaıtyn alańdar men skverler ornatylyp, jaryq baǵandary paıda boldy.
Bul – Shagabýddın men Chaıkovskıı kósheleri boıynda ornalasqan tuǵyn úı aýmaǵy. Almaly aýdanyna qarasty meken jaıda bıyl qurylys qarqyndy júrdi. Sport qurylǵylary ornatylyp, alańdarǵa rezeńke jabyn tóseldi. Balalar oınaıtyn aýlalar sharbaqtarmen qorshaldy. Dese de munyń bári jergilikti ákimdiktiń jyldaǵy josparly jumysy. Budan bólek, aýdanda «Halyq qatysatyn bıýdjet» baǵdarlamasy aıasynda da sharýa jasaldy.
«Bıyl bizde 42 aýlanyń ishinen 5 aýla tańdalyp alynyp, kúrdeli jumystan ótkizildi. Sondaı-aq «Halyqtyń bıýdjetke qatysý» baǵdarlamasy arqyly 21 aýlaǵa jumys júrgizilip, turǵyndar ózderiniń rızashylyǵyn bildirip jatyr», –dedi Almaly aýdany kommýnaldyq sharýashylyq bóliminiń basshysy Rýslan Aıtanov.
Osylaısha aınala jańasha túrlenip, bos jatqan jerlerdiń kórki kelisti. Balalar men egde jastaǵy zeınetkerler qýanyshynda shek joq. Jergilikti ákimdik ókilderi jobany bastamas buryn turǵyndardyń talap-tilegin tyńdaıdy. Tıisinshe oryndyqtar men balalar alańy kópshiliktiń talǵamyna qaraı ornatylǵan.
«Chaıkovskıı kóshesinde turǵanymyzǵa 48 jyl boldy. Sol ýaqyttan beri aýlamyzda tek balalar alańy bolatyn. Qazir dalaǵa shyqqanda demalatyndaı jaǵdaı jasap berdi», – dedi Almaly aýdanynyń turǵyny Kenjetaı Baraqbaeva.
«Aýlany abattandyrý jumystarynyń turǵyndarmen keńese otyryp júrgizilgeni qýantady. Bárimiz kórshiler bolyp shyǵyp, demalyp serýen qurýymyz úshin qajetti dúnıemizdi aıtamyz. Aýdan ákimdigi sol jospar boıynsha jumys júrgizedi», – dedi Almaly aýdanynyń turǵyny Elena Vavýlıdı.
Jaýaptylar mundaı jumystardyń keler jyly da jalǵasatynyn aıtty. Jalpy turǵyndar tarapynan bıyl 42 jobaǵa ótinim kelip tússe, sonyń beseýi aıaqtaldy. Qalǵan 37 joba aldaǵy jylǵa josparlanǵan.
