«حالىق قاتىساتىن بيۋجەت»:  الماتىدا 237 جوبا قارجىلاندىرىلدى

2262
Adyrna.kz Telegram

ازاماتتارعا قولايلى ورتا قۇرۋ شەڭبەرىندە تۇرعىنداردىڭ تالاپ-تىلەگىن ەسكەرۋ باستى مىندەت. بۇل رەتتە  مەملەكەت باسشىسى قاسىم-جومارت توقاەۆتىڭ قوعامداعى اشىقتىق پەن جاريالىلىقتى جەتىلدىرە تۇسەتىن تاعى ءبىر رەفورماسى – «حالىق قاتىساتىن بيۋدجەت» جوباسىنىڭ ماڭىزى وراسان، دەپ جازدى «ادىرنا» ءتىلشىسى.

بيىلعى جىلى الماتى قالاسىندا  «حالىق قاتىساتىن بيۋجەت» باعدارلاماسى اياسىندا 237 جوبا قارجىلاندىرىلدى. وسىلايشا، قالانىڭ 8 بىردەي اۋدانىندا جاڭا سكۆەرلەر مەن ويىن الاڭدارى سالىنىپ جاتىر. جۇمىس جىل سوڭىنا دەيىن اياقتالادى دەيدى ماماندار. جوبا ىسكە قوسىلعالى تۇرعىنداردىڭ سۇرانىسى بويىنشا قالادا ۇلتتىق ستيلدەگى بىرەگەي سكەيت، ۆوركاۋت الاڭدارى، اللەيالار جانە تاعى باسقا دا سپورت الاڭقايلارى جاسالعان.

الاتاۋ اۋدانىنداعى بۇل الاڭ وتكەن جىلى عانا بوس جاتقان ەدى. ءشوپ-شالاڭ ءوسىپ، قاراۋسىز قالعان. ال قازىر بالالار مەن اۋدان تۇرعىندارىنىڭ يگىلىگىنە جاراپ تۇر. «حالىق قاتىساتىن بيۋدجەت» باعدارلاماسى اياسىندا ويىن الاڭدارى سالىنىپ، اينالا تولىق اباتتاندىرىلدى.

«جاقسى سالىنعان، بالامىزبەن كەلىپ سەرۋەندەپ ءجۇرمىز. حالىقتىڭ سۇراۋىمەن پايدالى دۇنيە سالىنا بەرسە، كوبەيسە، قالامىز گۇلدەنسە تۇرعىندار دا ريزا بولار ەدى»،– دەدى الاتاۋ اۋدانىنىڭ تۇرعىنى نۇرلان شامالوۆ.

الاتاۋ اۋدانى بويىنشا جەرگىلىكتى تۇرعىن تاراپىنان بيىل 176 جوباعا ءوتىنىم تۇسكەن. 36 جوبا اۋدان جۇرتىنىڭ داۋىس بەرۋى ارقىلى ىرىكتەلىنىپ، ماقۇلداندى. قۇنى – 1 ملرد 800 مىڭ تەڭگە. ولاردىڭ قاتارىندا اللەيالار، ۆوركاۋت الاڭدارى جانە تاعى باسقا دا سپورت الاڭقايلارى بار. اكىمدىك وكىلدەرى باعدارلاما الداعى جىلى دا جالعاساتىنىن ايتىپ، كوپشىلىكتى قۋانتتى.

«الداعى 2023 جىلى جوبانى جالعاستىرۋ ماقساتىندا 100-دەن استام ۇسىنىس ءتۇستى. قازىر تۇرعىنداردىڭ داۋىس بەرۋى ارقىلى 26 جوبا انىقتالىپ وتىر. كەلەر جىلى جۇزەگە اسىرىلادى»، – دەدى الاتاۋ اۋدانى اكىمىنىڭ ورىنباسارى ەرتىس بەسىروۆ.

قالالىق باعدارلاما اياسىندا تەك جاڭادان الاڭقايلار عانا سالىنىپ قويماي، ءبىراز جىلدان بەرى جوندەلمەگەن، قاراۋسىز قالعان اۋلالارعا كۇردەلى جۇمىس تا جاسالادى.

ءدال وسى جوباسى شەڭبەرىندە جەتىسۋ اۋدانىندا 800 ملن. تەڭگەگە 23 جوبا ىسكە استى.

"بۇل جوبالار ۆەليكولۋكسكايا كوشەسىندە جاڭا قوعامدىق كەڭىستىك قۇرۋعا مۇمكىندىك بەردى", - دەيدى الماتى قالاسىنىڭ اكىمى ەربولات دوساەۆ.

سونداي-اق وسى كەزەڭدە جاڭا سپورت الاڭدارى، ونىڭ ىشىندە جانگەلدين جانە راتۋشنىي كوشەلەرىنىڭ بويىنداعى سكۆەرلەردە 6 تەننيس جانە 6 شاحمات ۇستەلدەرى ورناتىلدى.

اتالعان جوبا بويىنشا اۋدان تۇرعىندارى 2023 جىلعا قوعامدىق كەڭىستىكتى اباتتاندىرۋ جانە كوگالداندىرۋ، بالالار مەن سپورت الاڭدارىن جوندەۋ جانە ورناتۋ ءۇشىن 129 ءوتىنىم بەردى، ونىڭ ىشىندە 18 جوبا الدىن الا ىرىكتەلدى.

جالپى، باعدارلاما شەڭبەرىندە  اۋماق اباتتاندىرىلىپ، جاڭاشا تۇرلەنەدى. باعدارلامانىڭ ەرەكشەلىگى سول – كەز كەلگەن جۇمىس باستالماس بۇرىن، الدىمەن ءار تۇرعىننىڭ سۇراۋى ەسكەرىلەدى، تىلەگى تىڭدالادى.

پىكىرلەر