Azamattarǵa qolaıly orta qurý sheńberinde turǵyndardyń talap-tilegin eskerý basty mindet. Bul rette Memleket basshysy Qasym-Jomart Toqaevtyń qoǵamdaǵy ashyqtyq pen jarııalylyqty jetildire túsetin taǵy bir reformasy – «Halyq qatysatyn bıýdjet» jobasynyń mańyzy orasan, dep jazdy «Adyrna» tilshisi.
Bıylǵy jyly Almaty qalasynda «Halyq qatysatyn bıýjet» baǵdarlamasy aıasynda 237 joba qarjylandyryldy. Osylaısha, qalanyń 8 birdeı aýdanynda jańa skverler men oıyn alańdary salynyp jatyr. Jumys jyl sońyna deıin aıaqtalady deıdi mamandar. Joba iske qosylǵaly turǵyndardyń suranysy boıynsha qalada ulttyq stıldegi biregeı skeıt, vorkaýt alańdary, alleıalar jáne taǵy basqa da sport alańqaılary jasalǵan.
Alataý aýdanyndaǵy bul alań ótken jyly ǵana bos jatqan edi. Shóp-shalań ósip, qaraýsyz qalǵan. Al qazir balalar men aýdan turǵyndarynyń ıgiligine jarap tur. «Halyq qatysatyn bıýdjet» baǵdarlamasy aıasynda oıyn alańdary salynyp, aınala tolyq abattandyryldy.
«Jaqsy salynǵan, balamyzben kelip serýendep júrmiz. Halyqtyń suraýymen paıdaly dúnıe salyna berse, kóbeıse, qalamyz gúldense turǵyndar da rıza bolar edi»,– dedi Alataý aýdanynyń turǵyny Nurlan Shamalov.
Alataý aýdany boıynsha jergilikti turǵyn tarapynan bıyl 176 jobaǵa ótinim túsken. 36 joba aýdan jurtynyń daýys berýi arqyly iriktelinip, maquldandy. Quny – 1 mlrd 800 myń teńge. Olardyń qatarynda alleıalar, vorkaýt alańdary jáne taǵy basqa da sport alańqaılary bar. Ákimdik ókilderi baǵdarlama aldaǵy jyly da jalǵasatynyn aıtyp, kópshilikti qýantty.
«Aldaǵy 2023 jyly jobany jalǵastyrý maqsatynda 100-den astam usynys tústi. Qazir turǵyndardyń daýys berýi arqyly 26 joba anyqtalyp otyr. Keler jyly júzege asyrylady», – dedi Alataý aýdany ákiminiń orynbasary Ertis Besirov.
Qalalyq baǵdarlama aıasynda tek jańadan alańqaılar ǵana salynyp qoımaı, biraz jyldan beri jóndelmegen, qaraýsyz qalǵan aýlalarǵa kúrdeli jumys ta jasalady.
Dál osy jobasy sheńberinde Jetisý aýdanynda 800 mln. teńgege 23 joba iske asty.
"Bul jobalar Velıkolýkskaıa kóshesinde jańa qoǵamdyq keńistik qurýǵa múmkindik berdi", - deıdi Almaty qalasynyń ákimi Erbolat Dosaev.
Sondaı-aq osy kezeńde jańa sport alańdary, onyń ishinde Jangeldın jáne Ratýshnyı kósheleriniń boıyndaǵy skverlerde 6 tennıs jáne 6 shahmat ústelderi ornatyldy.
Atalǵan joba boıynsha aýdan turǵyndary 2023 jylǵa qoǵamdyq keńistikti abattandyrý jáne kógaldandyrý, balalar men sport alańdaryn jóndeý jáne ornatý úshin 129 ótinim berdi, onyń ishinde 18 joba aldyn ala irikteldi.
Jalpy, baǵdarlama sheńberinde Aýmaq abattandyrylyp, jańasha túrlenedi. Baǵdarlamanyń ereksheligi sol – kez kelgen jumys bastalmas buryn, aldymen ár turǵynnyń suraýy eskeriledi, tilegi tyńdalady.
