Almaty qalasy hımııa-bıologııa baǵytyndaǵy Nazarbaev Zııatkerlik mektebinde buryn ádiletsizdik jasalǵan qazaq tobyna qosymsha 41 grant bólindi. Bul týraly aqyn, QR Parlamenti Májilisi depýtaty. “Aq jol” partııasy tóraǵasynyń orynbasary Qazybek ISA Facebook paraqshasynda jarııalady, dep habarlaıdy “Adyrna” ulttyq portaly.
“Bul zor Jeńis! Ala jazdaı attandap shapqanymyz dalaǵa ketpedi! Almaty qalasy hımııa-bıologııa baǵytyndaǵy Nazarbaev Zııatkerlik mektebinde buryn ádiletsizdik jasalǵan qazaq tobyna qosymsha 41 oqýshyǵa grant bólindi!!!
Bul qýanyshty habardy estigende ózim nemese óz balam oqýǵa túskendeı qýandym. Kóz aldyma “Men kúnde tańǵy 6-dan turyp, keshke deıin daıyndaldym. Nátıjesinde orys bólimine túskenderden 60 bal artyq alsam da, qazaq bólimine tapsyrǵanym úshin oqýǵa ótpeı qaldym. Menen 60 bal tómen alǵan orys bólimindegi balalar mynaý Nazarbaev mektebinde oqyp jatyr!”- dep, burylyp, qolymen mekteptiń ásem ǵımaratyn kórsetip qoıyp, kóz jasyn súrtip turyp, býlyǵyp, qorlyq pen teńsizdikke, kórineý ádiletsizdikke jarylardaı zorǵa sóılep shyryldaǵan qazaqtyń qara domalaqtary Shyńǵys Sabyr men Amanhan Dinmuhanbet bastaǵan balalardyń kózderine týra qaraı alatyn boldym ǵoı dep qýandym. Ol balaqaı onyń vıdeosyn qoıyp, úkimetke suraý salǵan maqalam jarııalanǵan feısbýktaǵy paraqshama maǵan bata bergen vıdeosyn salyp jiberipti! “Perishteniń tilegi oryndalady, áýmın” dep qýanyp qalǵanmyn! Iá, 41 perishteniń - 41 balanyń tilegi oryndaldy! Alla jar bolsyn!”,- dep jazdy ol.
QR Parlamenti Májilisi depýtaty, “Aq jol” frakııasy múshesi Qazybek Isaǵa jazbasha da , vıdeomen de úndeý jasaǵan Baısal Tólen, Qýanhan Baqythan, Mýhamat Bolatbaıqyzy bastaǵan 50 shaqty ata-ana bolatyn. Balanyń tilegin jolda qaldyra almaǵan Qazybek Isa ádildiktiń ornaýy úshin Nazarbaev zııatkerlik mektebi” basqarma tóraıymy K.Shámshádınovaǵa eskertý jasady. Sondaı-aq, gazet pen saıttarǵa qoǵamdyq rezonans týdyratyn maqalalar jarııalady. Olar úlken qoldaýǵa ıe boldy.
“Balasy úzdik oqysa da, oqýǵa túse almaǵan ata-ananyń kúıi maǵan belgili. Joǵaryda men “óz balam oqýǵa túskendeı qýandym” dep bosqa aıtqan joqpyn. Únemi qalalyq, respýblıkalyq olımpıadalarda júlde alyp júrgen, keshe ǵana Astanadaǵy belgili ultshyl aǵartýshy Aıatjan Ahmetjanuly basqaratyn Qaıym Muqamedhan atyndaǵy #90 ulttyq gımnazııasynyń 9 synybyn, negizgi orta bilimin tuńǵysh úzdik attestatpen bitirgen qyzym Ámına Jarylqasyn 2019 jyly 6-shy synypty aıaqtar kóktemde týra osy Almatydaǵy hımııa-bıologııa baǵytyndaǵy Nazarbaev zııatkerlik mektebine synaq tapsyryp, negizgi pánderden joǵary upaı alyp tursa da, basqa janama pánderden baly tómen bolǵandyqtan ótpeı qalǵan edi…
Endi kezinde óz balam oqýǵa ótpese de, búgin 41 balamnyń oqýǵa túsýine úles qostym ǵoı dep qýanyshty sezimde otyrmyn. Óz balalaryma 41 bala qosylyp, álemdegi eń baı áke bolyp otyrǵan jaıymyz bar!”,- dedi Qazybek Isa.
Sonymen qatar, ol osy iste kúsh-jigerin aıamaǵan qoldaýlastaryna alǵys bildirdi.
