مۇرات ەسجان: اكىم حالىقپەن بىرگە بولۋ كەرەك دەگەندى وسىنشا دوكىر تۇسىنۋگە بولا ما؟!

4619
Adyrna.kz Telegram

مىناۋ ء“شىلي” ەندى. اكىم حالىقپەن بىرگە بولۋ كەرەك دەگەندى وسىنشا دوكىر تۇسىنۋگە بولا ما؟! وندا اكىم ۇشاقپەن ۇشپاسىن، پويىزبەن ءجۇرسىن. وندا دا اپالار بار عوي. ا، جوق، ەلدىڭ كوبى اپتوبىزدا، اكىم پويىزعا دا مىنبەسىن، جەزقازعانعا اۆتوبۋسپەن كەلسىن. جۇمىسقا اۆتوكولىكپەن ەمەس، جاياۋ قاتىناسىن.

قانشاما ەل ءجۇر عوي جاياۋ! قايتا اناۋ "ازاماتتىق قوعام قۇرۋشى ازامات" ەرتە توقتاپتى. اكىمياتقا بارىپ، اكىمدى كابينەتىنەن شىعارىپ الىپ، بازاردىڭ ءبىر بۋتيگىنەن ورىن الىپ وتىرعىزىپ قويۋ كەرەك ەدى، ەلمەن بىرگە بول دەپ. بۇل قانداي لوگيكا سوندا؟

انا اكىم دە سونداي قوي اۋزىنان ءشوپ الماس پا، الدە، الەۋمەتتىك جەلىدەن قورقىپ تۇر ما؟ “اينالايىن، ارى وينا! سەن قۇساپ ەرىگىپ جۇرگەم جوق!” - دەمەي مە؟ توقاەۆقا ايتام دەيدى. بىراق ەرىك بەرسەڭ، توقاەۆتى دا وسىلاي تومپاڭداتىپ قويماقشى بۇ "بەلسەندىلەر".

كەزىندە وسى كولۋمبيانىڭ پرەزيدەنتى ءتىس دارىگەرىندە كەزەكتە تۇر دەگەن سۋرەت حيت بولىپ ەدى. بىزدەگى جەلى قولدانۋشىلارى دا جاعاداعى قولدارىن جىبەرە سالىپ، جاپا تارماعاي لايك باسقان. ماعان ءبىرتۇرلى كورىندى. كەزەكتە تۇرىپ ۋاقىت قۇرتپاي، ءوزىنىڭ تىسىنەن ۇنەمدەگەن ۋاقىتىن ەلدىڭ ىسىنە كوبىرەك جۇمساماي ما دەيسىڭ عوي ەندى. ايتپەسە كولۋمبيانىڭ قانداي ەل ەكەنىن بىلەمىز عوي.

مىناۋ دا سونداي كەپ. بۇل بىرەۋدى قورعاۋ، بىرەۋدىڭ ءسوزىن سويلەۋ ەمەس. بەرىك ابدىعاليمەن تانىستىعىم دا، تامىرلىعىم دا جوق. قانداي دەپۋتات بولدى، قازىر قانداي اكىم، ەشبىرىنەن حابارسىزبىن. ونىڭ ورنىندا كەز-كەلگەن ءىس باسىنداعى ادام بولسا، وسى ويىمدى جازار ەدىم. سوسىن جۇيكەمە كامەرانى قوسىپ قويىپ پوليتسيانىڭ ابىرويىن توككەن، ولاردى ارانداۋعا يتەرمەلەگەن ۆيدەولار اسىرەسە قاتتى تيەدى.

مۇندايلار ازاماتتىق قوعام كورىنىسىنەن گورى پرولەتارياتتىق ۇران كوتەرگەن شولاق بەلسەندىلەردى كوبىرەك ەسكە سالاتىن سەكىلدى. قولدارىنا بيلىك بەرسەڭ، وزىمەن كەلىسپەگەندى قىرىپ جىبەرەتىن. تاريح كورسەتكەندەي.

"ادىرنا" ۇلتتىق پورتالى 

پىكىرلەر