"ۇلتتىق قۇندىلىقتارىمىزدى ۇلىقتايىق": DALA DAUYSY رەسپۋبليكالىق كونكۋرسى جاريالاندى

2104
Adyrna.kz Telegram

ەلىمىزدە «DALA DAUYSY» رەسپۋبليكالىق كونكۋرسى جاريالاندى. بۇل تۋرالى مادەنيەت جانە سپورت ءمينيسترى داۋرەن اباەۆ ءوزىنىڭ فەيسبۋك پاراقشاسىندا حابارلادى، دەپ جازادى "ادىرنا" ۇلتتىق پورتالى. 

"قاي ءداۋىردى الىپ قارامايىق، ءوزىنىڭ ءۇنىن، بەينەسىن، شەجىرەسىن مىندەتتى تۇردە تاريح جىلنامالارىنا جازىپ قالدىرادى. ءار حالىق ءوزىنىڭ ونەرى مەن ءتىلىن، ۇلتتىق مۋزىكاسى مەن ادەبيەتىن وركەندەتۋ ارقىلى جاس ۇرپاققا جول نۇسقايدى. بۇل قادام قازىرگىدەي جاھاندانۋ جاعدايىندا ءتىپتى ەرەكشە مانگە يە", - دەپ حابارلادى داۋرەن اباەۆ. 

ۇلتتىق قۇندىلىقتارىمىزدى ۇلىقتاپ، جاڭا ونەر تۋىندىلارى اۆتورلارىن قولداۋعا باعىتتالعان «DALA DAUYSY» رەسپۋبليكالىق كونكۋرسىن جاريالادىق. 

"جالپى قورى 46 ملن تەڭگەنى قۇرايتىن كونكۋرس نەگىزگى ۇلكەن 5 نوميناتسيا بويىنشا 16 سىيلىقتى قامتيدى. ونىڭ ىشىندەگى، «25 قازان – رەسپۋبليكا كۇنى» ۇلتتىق مەرەكەسىن ونەرپازدارىمىز شىعارماشىلىقتارىنا ارقاۋ ەتۋ ءۇشىن ارنايى تاعايىندالعان «رەسپۋبليكا ءانى» (ەسترادا جانرى بويىنشا پاتريوتتىق اندەر) نوميناتسياسىن ەرەكشە اتاپ كەتۋىمىزگە بولادى", - دەپ جازدى مينيستر. 

سونىمەن:
«ۇزدىك فولكلورلىق مۋزىكا»;
«ۇزدىك كلاسسيكالىق مۋزىكا»;
«ۇزدىك دراماتۋرگيالىق تۋىندى»;
«ۇزدىك مۋزىكالىق-تەاترلىق جانر تۋىندىسى»;
«رەسپۋبليكا ءانى» (ەسترادا جانرى);
مادەنيەت جانە سپورت مينيسترلىگىنىڭ 2 ارنايى جۇلدەسى.

"جاڭا اۆتوردى ەلگە تانىتۋعا، تىڭ تۋىندىلاردىڭ كوپشىككە تارالۋىنا، پاتريوتتىق اندەردىڭ كەڭىنەن ناسيحاتتالۋىنا سەرپىن بەرەتىن كونكۋرس شىعارماشىلىق يەلەرىن بەي-جاي قالدىرمايدى دەپ سەنەمىز. ونەرپازدارىمىز بايگەگە اتتارىن قوسىپ، باقتارىن سىنايتىن، جەڭىمپازدار قوماقتى جۇلدەمەن ماراپاتتالاتىن جاڭا جوبانى بىرگە قولدايىق!", - دەيدى اباەۆ.

كونكۋرس تۋرالى تولىق اقپارات ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق-دراما تەاترىنىڭ www.kaztheatre.kz سايتىندا كورسەتىلگەن. وتىنىمدەر 15 قازان مەن 15 قاراشا ارالىعىندا قابىلدانىپ، سىيلىقتى تاپسىرۋ كەزەڭى جەلتوقسان ايىنا جوسپارلانىپ وتىر. 

"ادىرنا" ۇلتتىق پورتالى 

پىكىرلەر