تولىقمەتراجدى انيماتسيالىق «كۇلتەگىن» مۋلتفيلمىندەگى نەگىزگى كەيىپكەرلەردى ەلىمىزدىڭ تەاتر جانە كينو اكتەرلەرى دىبىستاعان. ولاردىڭ قاتارىندا: قازاقستاننىڭ حالىق ءارتىسى نۇكەتاي مىشباەۆا، مەرەي اجىبەكوۆ، دينارا ابىكەەۆا جانە فيليپپ ۆولوشين بار، دەپ حابارلايدى قازاقپارات ش. ايمانوۆ اتىنداعى «قازاقفيلم» اق-عا سىلتەمە جاساپ.
سونىمەن قاتار كوپتەگەن گولليۆۋدتىق فيلمدەردى قازاق تىلىنە دىبىستاعان اكتەرلەر مەن وتاندىق تانىمال جاس اكتەرلەر رامازان امانتاي («بيزنەس پو-كازاحسكي»), ءاليحان بايسۇلتانوۆ («سەميا بازارباەۆىح») قاتىسقان. رەجيسسەردىڭ ايتۋىنشا، وتاندىق اكتەرلەر تاريحي كەيىپكەرلەردى دىبىستاۋدى اسا جاۋاپكەرشىلىكپەن جاساعان.
- تاريحي كەيىپكەرلەردى دىبىستاۋدا اكتەرلەر بار كۇشىن سالىپ جۇمىس ىستەدى. جالپى بارىمىزگە دە «كۇلتەگىن» ءفيلمى باعا جەتپەس تاجىريبە بەردى. جيىرماعا جۋىق ەلىمىزدىڭ ۇزدىك كومپيۋتەرلىك گرافيكا جانە انيماتسيا ماماندارى جۇمىس ىستەدى. ءبىر جىلدىڭ ىشىندە عانا جاساپ شىعاردىق. بۇل حالىقارالىق ستاندارتتار بويىنشا وتە از ۋاقىت. الايدا، بار كۇشىمىز بەن جانىمىزدى سالىپ جاساپ شىعارعان بۇل تۋىندى كىشكەنتاي كورەرمەندەرمىزبەن قاتار، بارلىق قازاقستاندىقتاردىڭ كوڭىلدەرىنەن شىعاتىنىنا سەنىمدىمىن، - دەدى رەجيسسەر اداي ءابىلدينوۆ.
- مۋلتفيلم كەيىپكەرلەرىن دىبىستاعاندى قاتتى ۇناتام، ويتكەنى وسىندا عانا داۋىستىڭ كومەگىمەن كەيىپكەرىڭنىڭ وبرازىن جاساي الاسىڭ. كەيىپكەردىڭ ماقساتىن، ەرەكشەلىكتەرىن جانە استارلى ارەكەتتەرىن داۋىس قانا بەرەدى. بۇل رەتتە اكتەر كوپتەگەن تەحنيكالىق ماشىقتارمەن قارۋلانۋى ءتيىس. مەن ءۇشىن مۋلتفيلمدە جۇمىس ىستەۋ - ۇلكەن تاجىريبە جيناۋ دەگەن ءسوز، - دەدى بالا كۇلتەگىندى ورىس تىلىنە دىبىستاعان فيليپپ ۆولوشين.
- «كۇلتەگىندى» كورگەن كەزىمدە ونىڭ گولليۆۋدتىق مۋلتفيلمدەردەن ەش كەم تۇسپەيتىنىن بايقادىم. مەن بۇل مۋلتفيلمدە بىلگە قاعاننىڭ بالا كەزىن دىبىستادىم. دۋبلياجداعى تاجىريبەم كوپ بولماسا دا، بۇل دىبىستاۋدان ەرەكشە ءلاززات الدىم. ويتكەنى، مەنىمەن بىرگە دوسىم ءاليحان بايسۇلتانوۆ دىبىستاۋعا قاتىستى. ول كۇلتەگىندى دىبىستادى، - دەدى رامازان امانتاي.
قر مادەنيەت جانە سپورت مينيسترىلىگىنىڭ تاپسىرىسى بويىنشا جاس رەجيسسەر-انيماتور اداي ءابىلدانىڭ قولىنان شىققان اتالمىش تاريحي انيماتسيالىق تۋىندى كوشپەندى حالىقتاردىڭ باسىن بىرىكتىرىپ، ۇلى كوشپەندىلەردىڭ ءداستۇرىن جالعاستىرعان تۇرىك قاعاناتىنىڭ داڭقتى اسكەري قولباسشىسى كۇلتەگىننىڭ جاستىق شاعى تۋرالى باياندايدى.
ەستەرىڭىزگە سالا كەتەيىك، مۋلتفيلم 22 قاراشادان باستاپ ەلىمىزدىڭ بارلىق كينوتەاترىندا پروكاتقا شىعادى.
"قازاقپارات" اگەنتتىگى
