Tolyqmetrajdy anımaııalyq «Kúltegin» mýltfılmindegi negizgi keıipkerlerdi elimizdiń teatr jáne kıno akterleri dybystaǵan. Olardyń qatarynda: Qazaqstannyń halyq ártisi Núketaı Myshbaeva, Mereı Ájibekov, Dınara Ábikeeva jáne Fılıpp Voloshın bar, dep habarlaıdy QazAqparat Sh. Aımanov atyndaǵy «Qazaqfılm» AQ-ǵa silteme jasap.
Sonymen qatar kóptegen gollıvýdtyq fılmderdi qazaq tiline dybystaǵan akterler men otandyq tanymal jas akterler Ramazan Amantaı («Bıznes po-kazahskı»), Álıhan Baısultanov («Semıa Bazarbaevyh») qatysqan. Rejısserdiń aıtýynsha, otandyq akterler tarıhı keıipkerlerdi dybystaýdy asa jaýapkershilikpen jasaǵan.
- Tarıhı keıipkerlerdi dybystaýda akterler bar kúshin salyp jumys istedi. Jalpy bárimizge de «Kúltegin» fılmi baǵa jetpes tájirıbe berdi. Jıyrmaǵa jýyq elimizdiń úzdik kompıýterlik grafıka jáne anımaııa mamandary jumys istedi. Bir jyldyń ishinde ǵana jasap shyǵardyq. Bul halyqaralyq standarttar boıynsha óte az ýaqyt. Alaıda, bar kúshimiz ben janymyzdy salyp jasap shyǵarǵan bul týyndy kishkentaı kórermendermizben qatar, barlyq qazaqstandyqtardyń kóńilderinen shyǵatynyna senimdimin, - dedi rejısser Adaı Ábildınov.
- Mýltfılm keıipkerlerin dybystaǵandy qatty unatam, óıtkeni osynda ǵana daýystyń kómegimen keıipkerińniń obrazyn jasaı alasyń. Keıipkerdiń maqsatyn, erekshelikterin jáne astarly áreketterin daýys qana beredi. Bul rette akter kóptegen tehnıkalyq mashyqtarmen qarýlanýy tıis. Men úshin mýltfılmde jumys isteý - úlken tájirıbe jınaý degen sóz, - dedi bala Kúltegindi orys tiline dybystaǵan Fılıpp Voloshın.
- «Kúltegindi» kórgen kezimde onyń gollıvýdtyq mýltfılmderden esh kem túspeıtinin baıqadym. Men bul mýltfılmde Bilge Qaǵannyń bala kezin dybystadym. Dýblıajdaǵy tájirıbem kóp bolmasa da, bul dybystaýdan erekshe lázzat aldym. Óıtkeni, menimen birge dosym Álıhan Baısultanov dybystaýǵa qatysty. Ol Kúltegindi dybystady, - dedi Ramazan Amantaı.
QR Mádenıet jáne sport mınıstriliginiń tapsyrysy boıynsha jas rejısser-anımator Adaı Ábildanyń qolynan shyqqan atalmysh tarıhı anımaııalyq týyndy kóshpendi halyqtardyń basyn biriktirip, Uly kóshpendilerdiń dástúrin jalǵastyrǵan túrik qaǵanatynyń dańqty áskerı qolbasshysy Kúlteginniń jastyq shaǵy týraly baıandaıdy.
Esterińizge sala keteıik, mýltfılm 22 qarashadan bastap elimizdiń barlyq kınoteatrynda prokatqa shyǵady.
"QazAqparat" agenttigi
