قاراعاندىلىق پوليتسەيلەر ءىز-ءتۇسسىز جوعالىپ كەتكەن ازاماتتىڭ ءمايىتىن تاپتى. بۇل تۋرالى Polisia.kz حابارلادى، دەپ جازادى "ادىرنا" ۇلتتىق پورتالى.
33 جاستاعى قالا تۇرعىنى 15 شىلدەدەن باستاپ ءىز-ءتۇسسىز جوعالۋىنا بايلانىستى ىزدەۋدە بولعان. ونىڭ ناقتى مەكەنجايىن انىقتاۋ شارالارى ەكى ايدان استام جۇرگىزىلدى. پوليتسيا قىزمەتكەرلەرى ازاماتتى انىقتاۋ جۇمىسىنا بارلىق كۇش قۇرالداردى جۇمىلدىرىپ، ونىڭ جاقىندارى مەن تانىستارى بويىنشا دا اقپاراتتار جينادى.
“جۇرگىزىلگەن جەدەل-ىزدەستىرۋ ءىس-شارالارى مەن تەرگەۋ ارەكەتتەرى بارىسىندا كريمينالدىق پوليتسيا قىزمەتكەرلەرى جوعالعان ازاماتتى ءولتىردى دەگەن كۇدىكپەن 38 جاستاعى قالا تۇرعىنىن ۇستادى. ول جابىرلەنۋشىمەن سوزگە كەلىسپەۋشىلىك بارىسىندا وعان دەنە جاراقاتتارىن كەلتىرىپ، قىلمىسىن جاسىرۋ ماقساتىندا ءمايىتتى جەر ۇيلەردىڭ ءبىرىنىڭ قوراسىندا كومىپ تاستاعانى تۋرالى مويىنداۋ كورسەتپە بەلگىلەرىن بەردى”، -دەپ حابارلادى قاراعاندى وبلىستىق پوليتسيا دەپارتامەنتى باستىعىنىڭ ورىنباسارى ءابىل ءابىلدين.
قازىرگى ۋاقىتتا اتالعان دەرەك بويىنشا قازاقستان رەسپۋبليكاسى قىلمىستىق كودەكسىنىڭ 99-بابىنا سايكەس قىلمىستىق ءىس قوزعالىپ، تەرگەۋ امالدارى جۇرگىزىلۋدە. كۇدىكتى ۋاقىتشا ۇستاۋ يزولياتورىنا قامالدى.
"ادىرنا" ۇلتتىق پورتالى
