قاراعاندىدا ايەل مەن ونىڭ 7 جاسار قىزىنىڭ دەنەسىن ورمان القابىنان تابىلدى. بۇل تۋرالى ekaraganda.kz سايتى مالىمدەدى، دەپ حابارلايدى “ادىرنا” ۇلتتىق پورتالى.
بولجام بويىنشا، ولار كىسى قولىنان كوز جۇمعان. قايعىلى وقيعا 18 نەمەسە 19 قىركۇيەكتە بولعان. 84 جاستاعى انتونينا يانگەلدىڭ ايتۋىنشا، شوبەرەسى مەن نەمەرەسى سىرتقا شىعىپ كەتىپ، قايتا ورالماعان. بىرنەشە كۇننەن كەيىن اجەسى ەكەۋىنىڭ دە كوز جۇمعانىن بىلگەن. ولاردىڭ مايىتتەرى قاراعاندىدان اقتاسقا بارار جولداعى ورمان القابىنان تابىلعان. كوزى دۇرىس كورمەيتىن اجە ەندى جالعىز قالىپ وتىر. ونىڭ ءبىر كەزدەرى ۇلى گەرمانيادا، قىزى ۋكراينادا بارىپ، جوعالىپ كەتكەن ەكەن.
تۇرعىندار الاڭداپ وتىر. قارت اجە از زەينەتاقىمەن ءومىر سۇرەدى، ونىڭ تۋىستارى جوق. تاماق جاساماق تۇگىلى، وزىنە تولىقتاي اقاراي المايدى. ەڭ سوراقىسى 33 جاستاعى ايەل مەن 7 جاستاعى قىزدى كىمنىڭ ولتىرگەنى بەلگىسىز.
“نەمەرەم قىزىمەن بىرگە ۇزاق ۋاقىت ۋكراينادا تۇرعان. كەيىن قازاقستانعا ورالىپ، مەنىمەن تۇرعىسى كەلەتىنىن ايتتى. ونى كوللەدجگە وقۋعا، سودان كەيىن مەديتسينالىق مەكەمەگە جۇمىسقا ورنالاستىرۋعا تىرىستىق.
سوڭىندا اۆتولومباردتا ەسەپشى بولىپ جۇمىس ىستەدى. جۇمىس ورنى جابىلىپ قالعان سوڭ ساۋدا ورتالىعىندا بۋتيكتىڭ ساتۋشىسى بولدى. نەمەرەمنىڭالعاشقى نەكەسى ءساتسىز اياقتالدى. باسىندا ءبارى جاقسى بولعان. جۇكتى بولعاننان كەيىن وعان كومەكتەسىپ تۇردىم. ەرلى-زايىپتىلار ءبىراز ۋاقىت بىرگە تۇردى”، – دەيدى انتونينا يانگەل.
قاريانىڭ ايتۋىنشا، ءبىر كەزدەرى نەمەرەسىنە بەلگىسىز بىرەۋدەن حاتتار كەلە باستاعان.
“ول كىمنەن، نە جازىلعانىن بىلمەيمىن. قايعىلى جاعدايعا سەبەپ بولدى ما، ول دا بەلگىسىز. پوليتسيا بۇل ءىستى تەرگەپ جاتىر ما؟ ونى دا بىلمەيمىن. ماعان ەشكىم كەلگەن دە جوق، قوڭىراۋ دا شالمادى” – ، دەيدى اجە دىرىلدەگەن داۋىسپەن.
قايعىلى وقيعانى قاراعاندى وبلىسى پوليتسيا دەپارتامەنتى راستاپ وتىر.
“24 قىركۇيەك ساعات 16.00 شاماسىندا اقتاس كەنتىنىڭ سىرتىنداعى ورمان القابىندا دەنەلەرى كۇرت بۇلىنگەن 33 جاستاعى ازاماتشا مەن ونىڭ 7 جاستاعى قىزىنىڭ ءمايىتى تابىلدى. اتالعان دەرەك بويىنشا قازاقستان رەسپۋبليكاسى قىلمىستىق كودەكسىنىڭ 99-بابى 2,3-تارماقتارىنا سايكەس قىلمىستىق ءىس تىركەلدى”، – دەلىنگەن پوليتسيا حابارلاماسىندا.
قاجەتتى ساراپتامالار تاعايىندالدى. پوليتسەيلەر تەرگەۋ جۇمىستارىن جۇرگىزىپ جاتىر.
