قاراعاندىدا ويىنشىق تاپانشامەن قورقىتىپ، ويىن كلۋبىنان 4 ميلليونعا جۋىق اقشا ۇرلاپ كەتكەن كۇدىكتىگە قاتىستى قىلمىستىق ءىس قوزعالدى. بۇل تۋرالى Polisia.kz جاريالادى، دەپ حابارلايدى “ادىرنا” ۇلتتىق پورتالى.
30 قىركۇيەك كۇنى ساعات 12.00 شاماسىندا قاراعاندى قالالىق پوليتسيا باسقارماسىنىڭ جەدەل باسقارۋ ورتالىعىنا قالاداعى ويىن كلۋبتارىنىڭ بىرىندە قاراقشىلىق شابۋىل بولعاندىعى تۋرالى حابارلاما ءتۇستى. وقيعا ورنىنا بىردەن جەدەل-تەرگەۋ توبى جىبەرىلدى.
پوليتسيا قىزمەتكەرلەرىنە كلۋبتىڭ قىزمەتكەرى ۇنەمى وسى مەكەمەدە ويىن ويناپ جۇرگەن كليەنتتىڭ ءبىرى كەنەتتەن تاپانشاعا ۇقساس زاتپەن قورقىتىپ، اقشا تالاپ ەتكەنىن ءتۇسىندىردى.
كۇدىكتى كاسساداعى 3,9 ملن تەڭگەنى قولدى قىلىپ، وقيعا ورنىنان ءىزىن سۋىتقان. 34 جاستاعى كۇدىكتى ازامات انىقتالدى. ول سول مەكەمەدەگى ويىن بارىسىندا قوماقتى قارجىسىنان ۇتىلىپ قالعانىن، ونىڭ ورنىن تولتىرۋ ماقساتىندا وسىنداي ىسكە بارعانى تۋرالى مويىنداۋ كورسەتپە بەلگىلەرىن بەردى. ول بۇنداي ىسكە بارۋ ءۇشىن ويىنشىق تاپانشا ساتىپ العان. كۇدىكتىدەن ايعاق زات تاركىلەندى.
اتالعان فاكتى بويىنشا قازاقستان رەسپۋبليكاسى قىلمىستىق كودەكسىنىڭ 192-بابىنا (قاراقشىلىق) سايكەس، قىلمىستىق ءىس قوزعالدى. كۇدىكتى ۋاقىتشا ۇستاۋ يزولياتورىنا قامالدى. تەرگەۋ امالدارى جۇرگىزىلۋدە.
