الماتىلىق ايەلدىڭ شوتىنان 5 مىڭ دوللار شەشىپ العان ەكى جىگىت ۆيدەوعا ءتۇسىپ قالعان. بۇل تۋرالى الماتى پوليتسياسى كامەرانىڭ وبەكتيۆىنە ءتۇسىپ قالعان ەكى ەر ادامنىڭ سۋرەتىن جاريالادى، دەپ حابارلايدى “ادىرنا” ۇلتتىق پورتالى.
پوليتسيا دەپارتامەنتىنىڭ مالىمەتىنشە، ولار جابىرلەنۋشىنى الداپ، اقشاسىن يەمدەنىپ العان.
«ايەلدىڭ ۇيالى تەلەفونىنا قوڭىراۋ شالعان ەر ادام ءوزىن بانك قىزمەتكەرىمىن دەپ تانىستىرىپ، ودان: «دەپوزيتتىك شوتتان جەكە شوتقا اقشا اۋدارۋعا ءوتىنىش بەردىڭىز بە؟» - دەپ سۇرايدى. سودان سوڭ كۇدىكتى ايەل ادامعا تەلەفونىنا كەلىپ تۇسكەن كودتى ايتاتىن بولسا، شوتقا كيبەرشابۋىلداردان قورعايتىن ارنايى قورعانىس ورناتامىز دەپ سەندىرگەن. ايەل ايتىلعان تالاپتاردى ورىنداعان»، - دەيدى الماتى قالالىق پد انىقتاۋ باسقارماسىنىڭ باستىعى ولجاس ءشارىپوۆ
پوليتسيا وكىلىنىڭ ايتۋىنشا، بىرنەشە كۇننەن كەيىن بانك قىزمەتكەرلەرى ايەلگە حابارلاسىپ، شوتىنان 5 مىڭ دوللاردان استام قاراجات شەشىلگەنىن ايتقان. تەك سول كەزدە الماتىلىق الاياقتاردىڭ قۇربانى بولعانىن تۇسىنەدى.
