يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز حاتشىسى جانجىگىت ومارحان بارلىق كولىك ينفراقۇرىلىمىنىڭ شتاتتىق رەجيمدە جۇمىس ىستەپ جاتقانىن مالىمدەدى، دەپ حابارلايدى «ادىرنا» ءتىلشىسى.
«قازىرگى تاڭدا ەلىمىزدىڭ بارلىق كولىك ينفراقۇرىلىمى شتاتتىق رەجيمدە جۇمىس ىستەۋدە. پويىزدار مەن ۇشاقتار جانە اۆتوبۋستار كۇندەگىدەي جولاۋشىلار تاسىمالىن ۇيىمداستىرۋدا.
⠀
سونداي-اق تاسىمالداۋ سىيىمدىلىعىن ارتتىرۋ جانە رەيستەردىڭ كەشىگۋ سانىن ازايتۋ ماقساتىنداعى تاپسىرمانى ورىنداۋ ءۇشىن كەشە كەشكىلىك وتاندىق اۋە پاركى تاعى ءبىر «Boeing-737» ۇشاعىمەن تولىقتى. بۇل SCAT اۆياكومپانياسىنىڭ سوڭعى ءبىر جارىم ايدا العان ءتورتىنشى «Boeing» اۋە كەمەسى. سىيىمدىلىعى 189 ورىندىقتى قۇرايتىن سامولەت اۆياكومپانيا پاركىندەگى 30-شى ۇشاق. بيىلعى جىلدىڭ سوڭىنا دەيىن قازاقستاننىڭ ازاماتتىق اۆياتسيا فلوتى تاعى دا 10 اۋە بورتىمەن تولىعادى دەپ جوسپارلانىپ وتىر.
⠀
رەسپۋبليكالىق ماڭىزى بار كولىك جولدارىنداعى قازىرگى جاعداي مەن ونداعى قوزعالىس قارقىندىلىعى دا الدىڭعى اپتالارداعىداي قالىپتى دەڭگەيدە»،—دەدى ول.
⠀
