كاسپي جاعالاۋىنداعى قامىس ءورتى «اقجايىق» مەملەكەتتىك تابيعي رەزەرۆاتىنىڭ اۋماعىن شارپىدى. بۇل تۋرالى وبلىستىق توتەنشە جاعدايلار دەپارتامەنتىنىڭ قوعاممەن بايلانىس توبى مالىمدەدى، دەپ حابارلايدى “ادىرنا” ۇلتتىق پورتالى.
مالىمەت بويىنشا، قازىر ءورت اۋماعى 60 گەكتارعا جەتكەن.
«اتىراۋ قالاسىنا تاياۋ ورنالاسقان كەڭوزەك اۋىلدىق وكرۋگىنە قارايتىن تاسقالا اۋىلىنان كاسپي تەڭىزىنە قاراي 40 شاقىرىم قاشىقتا قامىس ورتەنىپ جاتىر. بۇل – كاسپي تەڭىزىنىڭ جاعالاۋى. 20 قىركۇيەك، كەشكى ساعات 18:00-دەگى جاعداي بويىنشا، جالىن شارپىعان جاعالاۋ اۋماعى ۇلعايىپ، 60 گەكتارعا جەتتى. ال ساعات 19:40 شاماسىندا وت «اقجايىق» مەملەكەتتىك تابيعي رەزەرۆاتىنىڭ اۋماعىنا ءوتتى. تەڭىز جاعالاۋىندا جەل وڭتۇستىك-شىعىستان سوعىپ تۇر. ەكپىنى – 5-7 مەتر/سەكۋند. اۋا تەمپەراتۋراسى +30س شاماسىندا. ءورت اۋماعىندا ءموبيلدى جانە راديو بايلانىستىڭ جوقتىعى قيىندىق تۋدىرىپ وتىر»، -دەلىنگەن حابارلامادا.
ءورتتى سوندىرۋگە اتىراۋ وبلىستىق توتەنشە جاعدايلار دەپارتامەنتىنەن 31 قىزمەتكەر، 10 تەحنيكا، 1 سۋ كولىگى، «اق جايىق» مەملەكەتتىك تابيعي رەزەرۆاتىنان 20 جۇمىسشى مەن 5 تەحنيكا، جەرگىلىكتى اتقارۋشى ورگانداردان 3 ادام، 3 تەحنيكا، وزگە مەكەمەلەردەن 15 ادام، 2 تەحنيكا تارتىلعان.
«قازىر توتەنشە جاعدايلار دەپارتامەنتىندە جەدەل شتاب قۇرىلدى. 21 قىركۇيەك، تاڭعى ساعات 07:00-دە قامىس ءورتىن اۋەدەن ءسوندىرۋ جۇمىستارىنا «قازاۆياسپاس» اق-نىڭ مي-8 تىكۇشاعىن جۇمىلدىرۋ جوسپارلانىپ وتىر»، - دەپ ءمالىم ەتتى دەپارتامەنت.
”ادىرنا” ۇلتتىق پورتالى
