پرەزيدەنتتى تەك ءبىر مەرزىمگە، 7 جىلعا عانا سايلايتىنىمىز وتە دۇرىس قادام بولدى. مەن بۇل باستامانى قولدايتىنىمدى اشىق ايتىپ ءجۇرمىن. نەگە؟ ەڭ باستى دەگەن ەكى سەبەبىنە توقتالايىن.
بىرىنشىدەن، پرەزيدەنتتى ءبىر مەرزىمگە عانا سايلاۋ دامىعان ەلدەردىڭ باسىم كوپشىلىگىندە بار تاجىريبە. ويتكەنى، پرەزيدەنت 2 كەزەڭگە سايلاناتىن بولسا، وعان كەلەسى سايلاۋدا جەڭۋ قيىنعا تۇسپەيدى. بۇكىل رەسۋرس قولىندا بولعاندىقتان، ناتيجەگە اسەر ەتە الادى. باسەكەلەستىك جوعالادى. سايلاۋ كوميسسياسى بار، اكىمى بار، ءبارىن ايتقانىنا كوندىرەدى. مۇنداي جاعدايدا ەلدە بىرنەشە ىقپالدى پارتيالار بولماسا، سايلاۋدىڭ ءادىل ءوتۋى مۇمكىن ەمەس. مىنە، وسى سەبەپتى پرەزيدەنتتىڭ تەك ءبىر كەزەڭگە سايلانعانىن دۇرىس دەپ وتىرمىن.
ەكىنشىدەن، قازىر قوعامدا ءتۇرلى سۇراق تۋىنداۋدا. «كەلەسى پرەزيدەنت كەلىپ، ول دا كونستيتۋتسيانى تۇزەتسە نە ىستەيمىز؟» دەيدى. نەگىزسىز ەمەس، ورىندى ساۋال. بىراق ساۋالعا جاۋاپ دايىن، ولار ءبىر وزگەرىستى ەسكەرمەي وتىر. ەلىمىزدە 2023 جىلدىڭ 1 قاڭتارىنان باستاپ كونستيتۋتسيالىق سوت قىزمەتكە كىرىسەدى.
دەمەك، كونستيتۋتسياعا ءبىر باسشى ءوز قالاۋىمەن وزگەرىس ەنگىزە المايدى. بارلىق ۇسىنىس سوتپەن قارالادى. سوندىقتان، بۇدان بىلاي ىقپالى بار قالاعان ادام كونستيتۋتسيانىڭ ءماتىنىن تۇرتە بەرمەيدى. ءسوزدىڭ توق ەتەرى، قازىرگى جاڭا قادامداردى تولىق قۇپتايمىن.
"ادىرنا" ۇلتتىق پورتالى
