Prezıdent Qasym-Jomart Toqaev Álemdik jáne dástúrli dinder kóshbasshylarynyń VII sezine qatysty. Bul týraly Qazaqstan Respýblıkasy Prezıdentiniń Baspasóz qyzmeti málimdedi, dep habarlaıdy “Adyrna” ulttyq portaly.
Álemdik jáne dástúrli dinder kóshbasshylarynyń VII sezi duǵa jasaý úshin bir mınýttyq únsizdikten bastaldy.
«Álemdik jáne dástúrli dinder lıderleriniń pandemııadan keıingi kezeńdegi adamzattyń rýhanı jáne áleýmettik damýyndaǵy róli» atty plenarlyq otyrysty ashqan Memleket basshysy Qazaqstan úshin álemniń eń qurmetti rýhanı kóshbasshylaryn birge jınap, dıalog ornatý úlken qurmet ekenin atap ótti. Prezıdent óz sózinde álemdegi eń bedeldi rýhanı kóshbasshylardyń basyn qosyp, dıalog qurý elimiz úshin zor mártebe ekenin atap ótti. Prezıdent Vatıkan men Katolık shirkeýiniń basshysy Rım Papasy Franıskke, eń kóne Ál-Azhar ıslam ýnıversıtetiniń Joǵarǵy ımamy Sheıh Ahmad at-Taıebke, Orys pravoslav shirkeýiniń ókilderine, Izraıldiń Bas ashkenaz ravvıni Davıd Laýǵa, Izraıldiń Bas sefard ravvıni Ihak Iosıfke jáne forýmnyń barlyq qatysýshysyna óziniń iltıpatyn bildirdi.
“Bizdiń shaqyrýymyzdy qabyl alyp, Qazaqstanǵa kelgenderińiz úshin bárińizge alǵys aıtamyn. Bul beıbitshilikti saqtaýǵa jáne órkenıetaralyq dıalogty nyǵaıtýǵa bárimizdiń múddeli ekenimizdi kórsetedi. Ózgeriske toly ári belgisizdik beleń alǵan qazirgi zamanda búgingi basqosýdyń aıryqsha máni bar. Bizdiń sezd órkenıetaralyq dıalog ornatatyn jahandyq deńgeıdegi alqaly jıynǵa aınaldy. Bul forýmdy ótkizýge Qazaqstannyń bastamashylyq etýi beker emes. Sebebi qazaq jeri ǵasyrlar boıy Batys pen Shyǵystyń arasyndaǵy kópir bolyp keledi. Osynda, ıaǵnı Uly dala tórinde nebir alyp kóshpeli ımperııalar ómir súrgen. Dinı ustamdylyq – olardyń bárine ortaq sıpat”, – dedi Qasym-Jomart Toqaev.
“Adyrna” ulttyq portaly
