مەكسيكا مەتروسىندا ديماش قۇدايبەرگەننىڭ بەينەكليپتەرى كورسەتىلە باستادى. بۇل تۋرالى جۋرناليست وركەن كەنجەبەك ءوزىنىڭ فەيسبۋك پاراقشاسىندا حابارلادى، دەپ جازادى "ادىرنا" ۇلتتىق پورتالى.
"ديماش مەكسيكادا دا ديماش! مۇندا كەلەردەن ءۇش كۇن بۇرىن ديماشقا قاتىستى جاڭالىقتى كوزىم شالىپ قالعان. مەكسيكا استاناسى مەحيكو مەتروسىنداعى تەلەبەزەرلەردەن ديماشتىڭ Fly Away دەگەن كليپىن كورسەتىپ باستاپتى دەپ. مەحيكو مەتروسىنىڭ 70 ستانساسىنداعى 576 ەكراننان ءبىر اپتا بويى ساعات سايىن كورسەتۋىن ديماشتىڭ وسىنداعى فاناتتارى تالاپ ەتىپتى. فان-كلۋبى قانداي تاباندى دەيمىن دا، جەرگىلىكتى تەلەارنانى قىستاعان. ولارعا كەرەك لايكىن جيناپ بەرگەن. ەندى وسى جاڭالىقتى ءىس جۇزىندە تەكسەرۋ ءۇشىن مەكسيكادا ۋاقىتىم تىعىز بولسا دا مەتروسىنا ءتۇسىپ، ءبىر ساعات كۇتتىم. راس ەكەن. مىنە، دالەل! ءبىزدى الىپ جۇرگەن گيد، ۋكراينكا سوفيا ۆوۆك تە جانىن شۇبەرەككە ءتۇيىپ تۇرعان ەدى، ەندى جاقسىلاپ شاي ىشسەك بولادى. ال مەكسيكانىڭ مەتروسىمەن كىم جۇرمەيدى دەيسىڭ، سەبەبى، قالادا 22-28 ملن اراسىندا ادام تۇرادى. ءالى تولىق ەسەپتەپ بىتە الماي جاتىر. سوسىن مەترو وتە ارزان كولىك ءتۇرى مۇندا. 5 پەسو ءبىر جاققا. 120 تەڭگە بىزدىڭشە. سوندىقتان، سول ميلليونداردىڭ مىڭى بولسىن، ءبىزدىڭ تۇرگە، ۇنگە ۇيرەنە بەرسىن، ءا؟ قازاقتىڭ ابىرويى ارتا بەرسىن!", - دەپ جازدى وركەن كەنجەبەك.
"ادىرنا" ۇلتتىق پورتالى
