Adyrna.kz رەداكتسياسى ارنايى زەرتتەۋ جۇرگىزىپ، ءبىلىم سالاسىنداعى بىلىقتاردى اشكەرە ەتۋدى جالعاستىرادى.
ەستەرىڭىزدە بولسا، بۇعان دەيىن بۇرىنعى ءبىلىم جانە عىلىم ءمينيسترى، قازىرگى سەنات دەپۋتاتى باقىتجان جۇماعۇلوۆ پەن ونىڭ وتباسىنا تيەسىلى بىرقاتار «جاسىرىن بيزنەستەرىن» جازعان بولاتىنبىز. بۇگىنگى زەرتتەۋ ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ جايلى بولماق.
ايەلى ءاليحان بوكەيحان ۋنيۆەرسيتەتىن باسقارادى
ەرلان سىدىقوۆتىڭ ايەلى شىرىن قۇرمانباەۆا - سەمەيدەگى ءاليحان بوكەيحان ۋنيۆەرسيتەتىنىڭ (بۇرىنعى اتاۋى قازاق يننوۆاتسيالىق گۋمانيتارلىق-زاڭ ۋنيۆەرسيتەتى) رەكتورى ءارى قۇرىلتايشىسى. بيىلدىڭ وزىنە 208 492 300 تەڭگە سالىق تولەپ ۇلگەرگەن. العاشقى جىلى 63 094 300 تەڭگە سالىق تولەگەن بولسا، 2021 جىلى 293 979 340 تەڭگەگە دەيىن جەتكەن. 2013 جىلدان بەرى تولەگەن جالپى سالىق كولەمى - 1 666 708 677 تەڭگە.
نازارباەۆ رەجيمى تۇسىندا بايىپ ۇلگەرگەن «ۇلگىلى وتباسى»
شىرىن قۇرمانباەۆانىڭ بايلىعى مۇنىمەن شەكتەلمەيدى. وسىعان ۇقساس تاعى بىرنەشە مەكەمە بار. ايتالىق، «سەمەي گۋمانيتارلىق-زاڭ ينستيتۋتى»، «Innovative College» مەكەمەسى، «Abai IT-Valley» تەحنولوگيالىق كلاستەرى، «Syrlascloud» جشس، «سەمەي كوپ سالالى كوللەدجى» بار. سونداي-اق «Natural product» جشس، «EAGLTD» كومپانياسى، «Access Rail» جشس، «AECOM-KZ» كومپانياسى، «AERODYNE CASPIAN» جشس، «AFCON PV KZ» جشس، «ەۆروكوپتەر كازاحستان ينجينيرينگ» كومپانياسى، «ALBERLEY كەلىسىم-شارت LTD» جشس، «الەسسيو گرۋپپ» جشس، «الەسسيو ستاندارت» جشس قۇرمانباەۆانىڭ يەلىگىندە.
ءبىر قىزىعى اتالعان كومپانيالاردىڭ بارلىعىندا شىرىن قۇرمانباەۆا قۇرىلتايشى رەتىندە كورسەتىلگەن. بۇل نە دەگەن باتپان قۇيرىق دەسەڭشى؟! بىراق بۇل سىدىقوۆتار بايلىعىنىڭ ءبىر پۇشپاعى عانا.
رەكتوردىڭ ەركە قىزىنا تيەسىلى بيزنەستەر
ۇلكەن قىزى سىدىقوۆا الۋا ەرلانقىزى «Californication women» جشس-ءنىڭ، «Californication project, «ءبىلىم» جشس، «L.A. Group Astana» جشس-نىڭ قۇرىلتايشىسى.
2013 جىلدان بەرى تولەگەن جالپى سالىق كولەمى - 3 678 341 تەڭگە. سونداي-اق ول بۇرىنعى سەنات توراعاسى قايرات ءماميدىڭ قىزى اينۇر ماميمەن دە سەرىكتەس. ەكەۋى «سalifornication» جشس-نا تەڭ قۇرىلتايشى رەتىندە تىركەلگەن. بۇل – الماتىداعى برەندتىك بۋتيك. مەكەمەگە دينارا يۋنۋسوۆا ەسىمدى ادام باسشىلىق ەتەدى. كومپانيا قۇرىلعان 2012 جىلدان بەرى 6 187 713 تەڭگە سالىق تولەگەن.
سونىمەن بىرگە نۇر-سۇلتان قالاسىندا سىدىقوۆتارعا تيەسىلى «Parclub» مونشاسى دا بار.
«بولاشاقتىڭ» تالاپتارىنا باعىنبايتىن سىدىقوۆتار
كىشى قىزى سىدىقوۆا الما ەرلانقىزى «بولاشاق» باعدارلاماسىمەن ۇلىبريتانيادا ءبىلىم العان. كەيىننەن ەلگە قايتقىسى كەلمەدى مە، سول ەلدە «بولاشاق» باعدارلاماسىنىڭ وكىلى رەتىندە جۇمىس ىستەگەن. الايدا حالىقارالىق باعدارلامالار ورتالىعى الماعا ەلگە قايتۋ تۋرالى ەسكەرتپە جىبەرەدى. ەسكەرتپەگە كونبەگەن ول ىسكە اكەسى ەرلان سىدىقوۆتى ارالاستىرعان. ارتىنشا الۋا سىدىقوۆا 2020 جىلدىڭ 8 قاڭتارىندا ءوز ەركىمەن جۇمىستان بوساتۋ تۋرالى ءوتىنىش جازادى.
ەرلان سىدىقوۆتىڭ بالدىزى بولۋ - باقىت
ەرلان سىدىقوۆ ءبارىن جارىلقاپ بالدىزىن ۇمىتپاسا كەرەك، ايەلى شىرىن قۇرمانباەۆانىڭ يەلىگىندەگى «Innovative College» مەكەمەسىنە كۇمىس ورازباەۆانى ديرەكتور قىلىپ قويىپتى. بۇل مەكەمەنىڭ تولەگەن جالپى سالىق كولەمى 138 570 430 تەڭگە.
تاعى ءبىر بالدىزى ايجان ورازباەۆا - «سەمەي كوپ سالالى كوللەدجىنىڭ» ديرەكتورى. اتالعان وقۋ ورنى 2010 جىلى قۇرىلعان. وسى كۇنگە دەيىن تولەگەن سالىق كولەمى 136 996 125 تەڭگە.
جاعىمپازدىق سيندرومى
ەرلان سىدىقوۆتىڭ وزىنە كەلەتىن بولساق، 2011 جىلى نازارباەۆقا رەفەرەندۋم وتكىزۋ تۋرالى باستاما كوتەرىپ، استانادان ءبىر-اق شىققانى بار. ول وسىعان دەيىن سەمەيدەگى شاكارىم اتىنداعى مەملەكەتتىك ۋنيۆەرسيتەتىن باسقارىپ كەلدى. ەستەرىڭىزدە بولسا، شىعىس قازاقستاننان شىققان باستاماشىل توپ پرەزيدەنتتىڭ وكىلەتتىلىگىن ۇزارتۋ ءۇشىن بۇكىلحالىقتىق رەفەرەندۋم قاجەتتىلىگىن العا تارتىپ، 5 ملن-نان استام قول جيناعان بولاتىن.
مىنە، وسىلايشا رەكتورلار اۋلەتى ىرگەلى ءبىلىم وردالارىن جەكەشەلەندىرىپ، ويلارىنا كەلگەنىن ىستەپ وتىر. نە وزدەرى وزگەرمەيدى، نە وزگەرۋگە مۇمكىندىك بەرمەيدى. بىراق قارالى قاڭتاردان كەيىن ولاردىڭ تىنىسى تارىلعانى انىق. دەسە دە، ولاردىڭ مونوپولياسى بيلىكتىڭ كوزىنە ءالى دە تۇسەر ەمەس. تىلەگىمىز ەسسىز ەسىرگەندەر «جاڭا قازاقستاندا» جازادان قۇتىلىپ كەتپەسە ەكەن دەيمىز.
«ادىرنا» ۇلتتىق پورتالى
