قازاقستاننىڭ ەكس-پرەمەر-ءمينيسترى قاجىگەلدين توقاەۆتىڭ شتاتتان تىس كەڭەسشىسى بولىپ تاعايىندالدى. بۇل تۋرالى «DALA INCIDE» telegram-ارناسى حابارلايدى، دەپ جازادى "ادىرنا" ۇلتتىق پورتالى.
"توقاەۆ قاجىگەلديندى قاجەتكە جاراتۋدا! اكەجان پرەزيدەنتتىڭ شتاتتان تىس كەڭەسشىسى بولىپ العان. جاڭا قازاقستان نازارباەۆتىڭ قارسىلاستارىمەن ءتىل تابىسا باستادى. ايگىلى اكەجان قاجىگەلدين ءبىرتالاي ۋاقىتتان بەرى پرەزيدەنتكە ۋازىرلىك ەتۋدە. توقاەۆتىڭ ەكس-پرەمەرگە ارقا سۇيەۋى تەگىن ەمەس. اكەجان نازارباەۆ اۋلەتىنىڭ وسال تۇسىن جاقسى بىلەدى. وتباسىنىڭ باتىس بانكتەرىندەگى جيناقتارى، وففشورداعى كاپيتالى، جىلجىمايتىن مۇلكى تۋرالى تالاي جىلدان بەرى تىنباي تەرگەۋ جۇرگىزگەن قاجىگەلدين قولداعى قۇندى مالىمەتتى جۇرتقا جاريا ەتۋگە ءازىر. نازارباەۆ كلانىنىڭ اقپاراتتىق شابۋىلىنا توتەپ بەرۋ ءۇشىن توقاەۆ ەكس-پرەزيدەنتتىڭ وپپونەنتتەرىمەن ىمىرلاسقان سىڭايلى", - دەلىنگەن حابارلامادا.
اتالمىش اقپارات اگەنتتىگىنىڭ حابارلاۋىنشا، مەملەكەت باسشىسى ەسكى جۇيەنىڭ وڭايلىقپەن بەرىلە سالماسىن جەتە تۇسىنەدى.
نازارباەۆتىڭ كەسىرىنەن قيىر قونىپ، شەت جايلاپ جۇرگەن وپپوزيتسيا توقاەۆتىڭ تاپقىرلىعى مەن تاباندىلىعىنا ءتانتتى. ونىڭ وراشولاق شەشىم قابىلداماسىنا كوزى جەتكەن. تۇپتەپ كەلگەندە قازاقستاننىڭ قازىرگى پرەزيدەنتى مەن شەتتەگى وپپوزيتسيانىڭ ورتاق جاۋى - نازارباەۆ كلانى. ال قاجىگەلدين قانشا جەردەن وپپوزيتسيا بولعانىمەن توقاەۆقا ءتىل تيگىزگەن ەمەس. كەرىسىنشە، پرەزيدەنتتىڭ جاڭا قازاقستان ورناتۋعا العىشارت بولعان بىرقاتار يدەيالارىنىڭ باستاۋىندا قاجىگەلديننىڭ قولتاڭباسى جاتقانداي كورىنەدى.
ماسەلەن وسىدان بىلتىر dalanews.kz سايتىندا جاريالاعان ماقالاسىندا قاجىگەلدين ەسكى جۇيە قيراعاننان كەيىن ۇلتتىق قۇرىلتاي وتكىزۋدى ۇسىنعان.
"توقاەۆ قولىنداعى بيلىكتى پايدالانىپ ۇلتتىق قۇرىلتاي شاقىرۋى قاجەت. وسى قۇرىلتايدا جاڭا كونستيتۋتسيا مەن جاڭا ساياسي قۇرىلىمداردى جاساقتاۋعا جول اشىلۋى ءتيىس", - دەگەن ەدى اكەجان مىرزا.
قۇرىلتاي ناتيجەسىندە مارقۇم راحات اليەۆتىڭ نۇسقاۋىمەن سوتتالعان ازاماتتار جانە ساياسي تۇتقىندار تۇرمەدەن بوساۋى كەرەكتىگىن ايتقان. ۇلتتىق قۇرىلتايدىڭ دۇرىلدەپ وتكەنىنەن حاباردارسىزدار...
جاڭا كونستيتۋتسيا قابىلداۋ تۋرالى دا ۇسىنىس تا قاندى قاڭتارعا دەيىن قاجىگەلديننىڭ اۋزىمەن ايتىلعان ەدى.
"توقاەۆ تاريحتا جاقسى اتپەن قالعىسى كەلەدى! مۇنىڭ ءبىر جولى جاڭا كونستيتۋتسيا قابىلداۋ. جالپىحالىقتىق رەفەرەندۋم وتكىزۋ. اتا زاڭنىڭ جاڭا نۇسقاسىن حالىق تالقىسىنا سالىپ، سونىڭ نەگىزىندە بيلىكتى حالىققا قايتارسا ابىرويىن ساقتاپ قالادى. وسىنىڭ اياسىندا نازارباەۆ اۋلەتىنە دە كەپىلدىك بەرىلەدى. جاڭا قۇجاتتا كەزەكتەن تىس پرەزيدەنت سايلاۋىن ءادىل وتكىزۋ زاڭمەن بەكىتۋلى ءتيىس”، – دەگەن-تۇعىن ەكس-پرەمەر.
وزدەرىڭىز بىلەتىندەي، اتا زاڭعا وزگەرىس ەندى. بيىل كەزەكتەن تىس پرەزيدەنت سايلاۋى وتەدى...
قازاقستاننىڭ پارلامەنتتىك رەسپۋبليكاعا اۋىساتىنىن دا شىم-شىمداپ جەتكىزگەن قاجىگەلدين ەدى. "پارلامەنت ەسكى جۇيە وكىلدەرىنىڭ شەتەلدەگى ەسەپ-شوتىندا جاتقان قيساپسىز قاراجاتتى ەلگە قايتارۋ ءۇشىن كۇرەسەدى. ەل بايلىعىن ءار تۇرعىنعا ءادىل ءبولىپ بەرەدى", – دەيدى اكەجان مىرزا.
"ادىرنا" ۇلتتىق پورتالى
