بقو-دا ەسكى توڭازىتقىشتىڭ ىشىنەن 5 جاسار بالانىڭ دەنەسى تابىلدى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
وقىس وقيعا 8 تامىزدا بولعان. بالانىڭ دەنەسىن اناسى تاپقان. ايەلدىڭ ايتۋىنشا، ونىڭ ءۇش بالاسى كوشەدە ويناپ جۇرگەن. بىراق كەشكە قاراي ۇيگە ەكەۋى عانا ورالعان. مۇنى بىلگەن ايەل ءبىر ساعات بويى اۋدان بويىنشا كىشى ۇلىن ىزدەگەن. كەيىن ءۇيىنىڭ اۋلاسىنا كىرىپ، ەسكى جۇمىس ىستەمەيتىن توڭازىتقىشتىڭ ىشىنەن ءبۇلدىرشىننىڭ دەنەسىن تاپقان. اناسى جەدەل جاردەم شاقىردى. دارىگەرلەر وقيعا ورنىنا جەتكەندە بالانىڭ ءولىمىن تىركەدى.
– بۇل كەڭەستىك توڭازىتقىشتا ەسىكتىڭ مەتالل تۇتقاسىندا ورنالاسقان اۆتوماتتى قۇلىپتاۋ جۇيەسى بار. ەگەر ءسىز ەسىكتى يتەرسەڭىز، قۇلىپ جابىلىپ قالادى. توڭازىتقىشتىڭ سىرتىنداعى تۇتقانى تارتىپ العانشا توڭازىتقىشتى ىشىنەن اشۋ مۇمكىن ەمەس، – دەپ حابارلايدى پوليتسيا دەپارتامەنتىنىڭ وكىلى داريعا ءماجيتوۆا.
سوتقا دەيىنگى تەرگەۋ اياسىندا بالانىڭ مايىتىنە مەديتسينالىق زەرتتەۋ تاعايىندالدى. اتالعان فاكت جازاتايىم وقيعا رەتىندە تىركەلدى.
