ەلوردادا قوعام قايراتكەرى، ساياساتكەر رىسبەك سارسەنبايۇلىن پوليتسيا قىزمەتكەرلەرى ۇستاپ الىپ كەتتى، دەپ جازادى "ادىرنا" ۇلتتىق پورتالى.
«بۇگىن تاڭعى جەتىدە ول قاڭتار وقيعاسى كەزىندە تۋىستارى زارداپ شەككەن ايەلدەردى قورعاۋ ءۇشىن استاناعا ۇشىپ كەتتى. ولار ۇكىمەت عيماراتىنىڭ جانىندا نارازىلىق ءبىلدىرىپ، قازا تاپقاندارعا قاتىستى باستالعان قىلمىستىق ىستەردى توقتاتۋدى تالاپ ەتتى. ۇكىمەت ءۇيىنىڭ ماڭىنا جينالعان نارازى توپتىڭ بارلىق مۇشەسىن پوليتسيا ۇستاپ اكەتتى. ال رىسبەك سارسەنبايۇلى ولارعا اراشا تۇسۋگە تىرىستى، الايدا ونى دا ۇستاپ، كولىككە سالىپ، پوليتسيا بولىمشەسىنە اپاردى. بولىمشە تابالدىرىعىن اتتاعان سوڭ ونىڭ دەنساۋلىعى سىر بەردى. جەدەل جاردەم شاقىرىلىپ، وعان العاشقى كومەك كورسەتىلدى. قازىرگى كەزدە جاعدايى جاقسى، ءبىر قالىپتى. ول ءوزىن پوليتسيا قىزمەتكەرلەرىنىڭ زاڭسىز ۇستاعانىنا نارازىلىق بىلدىرۋدە. وعان قاتىستى قانداي شارا قولدانىلاتىنى ءالى بەلگىسىز. ولاردى ءالى دە پوليتسيا بولىمشەسىندە ۇستاپ وتىرعاندىقتان، رىسبەك سارسەنبايۇلى ايەلدەردى بوساتۋدى تالاپ ەتۋدە»، — دەپ مالىمدەدى وپپوزيتسيالىق ساياساتكەر بولات ءابىلوۆ.
"ادىرنا" ۇلتتىق پورتالى
