قازاقستان مەكتەپتەرى 4 ءپان بويىنشا وقۋ باعدارلامالارىن جاڭارتادى

2182
Adyrna.kz Telegram

ءبىلىم ءمينيسترى اسحات ايماعامبەتوۆ قازاقستاندىق مەكتەپتەردە جاراتىلىستانۋ-ماتەماتيكالىق پاندەر بويىنشا ساعاتتار كوبەيتىلەتىنىن ايتتى، - دەپ حابارلايدى "ادىرنا" ءتىلشىسى.

"پرەزيدەنت جاراتىلىستانۋ-ماتەماتيكالىق تسيكل جانە تىلدىك پاندەرگە باسىمدىق بەرۋدى تاپسىردى. ماتەماتيكا، فيزيكا، حيميا، بيولوگيا پاندەرىنىڭ ساعاتتارى كوبەيەدى. وقۋ باعدارلامالارى جاڭارتىلادى.

2024 جىلدان باستاپ حالىقارالىق تاجىريبەگە سايكەس ءۇشىنشى سىنىپتا اعىلشىن ءتىلىن وقىتۋ ساعاتتارىن ۇلعايتۋ جانە قازاق جانە ورىس تىلدەرىن مەڭگەرۋگە قاجەتتى وقۋ جۇكتەمەسىن قامتاماسىز ەتۋ شارالارى قابىلدانادى»، - دەدى مينيستر ۇكىمەت وتىرىسىندا.

سونداي-اق، ونىڭ ايتۋىنشا، مەكتەپتەردىڭ قۇرىلىسى كەلەسى جىلى بۇرىن بولماعان ۇلكەن كولەمدە باستالادى.

«ماسەلەن، كەلەسى جىلى ءبىر عانا ەلوردامىزدا وسى جوبا اياسىندا ارقايسىسى ەكى مىڭ وقۋشىعا ەسەپتەلگەن 20 جاڭا مەكتەپتىڭ قۇرىلىسىن باستاۋدى جوسپارلاپ وتىرمىز»، - دەدى مينيستر.

ول مەملەكەت باسشىسىنىڭ تاپسىرماسىنا سايكەس الەۋمەتتىك وسال وتباسىلاردا تۇراتىن بالالار مەكتەپ فورماسىمەن تەگىن قامتاماسىز ەتىلەتىنىن ناقتىلادى.

سونداي-اق، ونىڭ ايتۋىنشا، بالالاردى وقىتۋعا بيۋدجەتتەن بولىنگەن قاراجاتتى قامتيتىن ءبىلىم بەرۋ شوتى ەنگىزىلەدى.

«جايلى مەكتەپ» ۇلتتىق جوباسى بويىنشا 800 مىڭنان استام وقۋشى ورىنى ەنگىزىلەدى، بۇل ءۇش اۋىسىمدى جانە اپاتتى مەكتەپتەر ماسەلەسىن شەشەدى»، - دەپ سەندىردى ايماعامبەتوۆ.

ول بارلىق مەكتەپتەر بىرىڭعاي ستاندارت بويىنشا سالىنىپ، جابدىقتالاتىنىن اتاپ ءوتتى.

"جوبا اياسىندا اشىلعان مەكتەپتەر زاماناۋي كابينەتتەرمەن تولىق قامتاماسىز ەتىلەدى. جاڭا مەكتەپتەردە وقۋ ورىندارى كوبىرەك بولادى. باستاۋىش جانە ورتا سىنىپتار ءۇشىن دە بولەك بلوكتار قاراستىرىلعان. تيىسىنشە، ولار جەكە سپورت زالدارى مەن اسحانالارمەن قامتاماسىز ەتىلەدى", - دەپ تولىقتىردى ول.

"ادىرنا" ۇلتتىق پورتالى

پىكىرلەر