بەلسەندى جانە قوعام قايراتكەرى ارمان شوراەۆ وپپوزيتسيا وكىلدەرى مەن تىركەلمەگەن پارتيا جەتەكشىلەرىنە قازاقستانداعى الداعى كەزەكتەن تىس پرەزيدەنتتىك سايلاۋعا ءبىر كانديداتتى تاڭداۋ ۇسىنىسىمەن ۆيدەوۇندەۋ جولدادى، دەپ حابارلايدى “ادىرنا” ۇلتتىق پورتالى.
“اسا قۇرمەتتى جەرلەستەر، وتانداستار! كۇنى كەشە عانا ەلىمىزدە جەلتوقساندا پرەزيدەنت سايلاۋى وتەتىنىن ەستىدىك. جالپى سوڭعى 30 جىلدا بيلىكتىڭ اتىنان سايلاۋ كەزەكتەن تىس وتەتىنەنە ۇيرەنىپ قالدىق. ول سايلاۋدا كىم جەڭەتىنىن دە الدىن-الا ءبىلىپ وتىراتىن بولدىق.
قازىر ءبارى وزگەردى. قاڭتاردان باستاپ ەل وزگەردى. الەم وزگەردى. سونى ەسكەرسەك، مەنىڭشە، وسى سايلاۋدا بيلىكتىڭ ستسەناريىنەن بولەك، ءوزىمىزدىڭ كۇن ءتارتىبىمىزدى ورناتۋىمىز كەرەك. ءبىزدىڭ ەلدە “مەن” دەي الاتىن، “سەن تۇر، مەن اتايىن” دەگەن باسقا مىقتى ازاماتتار كوپ. نامىسىن نانعا ايىرباستامايتىن ازاماتتار بار. ەلدى باسقارا الاتىن ازاماتتار كوپ. بىراق سونىڭ ىشىندە جۇزدەن جۇيرىك، مىڭنان تۇلپار ءبىر ازاماتتى ءوزىمىز ىرىكتەپ، سايلاۋعا قوسۋىمىز كەرەك دەپ ويلايمىن”،-دەدى ول.
سونداي-اق، ارمان شوراەۆ بىرنەشە قوعام بەلسەندىسىنىڭ ەسىمىن اتاپ، باس قوسۋعا شاقىردى.
“وسى ۇندەۋىمىز ەلىمىزدە “مەن” دەي الاتىن ازاماتتارعا ارنالادى. اتاپ ايتساق، ولاردىڭ ىشىندە ەرمۇرات اعا باپي، بولات ءابىلوۆ، رىسبەك اعا سارسەنباەۆ، مۇحتار تايجان، مارعۇلان سەيسەنباي، سەرگەي دۋۆانوۆ، توعجان قوجالي، دينا ەلگەزەك، تاعى دا مەن ۇمىت قالدىرعان قوعام بەلسەندىلەرى بارلىعىمىز ءبىر جەردە جينالىپ، ءبىر ادامدى وسى سايلاۋعا كانديدات رەتىندە ۇسىنۋىمىز كەرەك. ەگەر ءبىزدىڭ ويىمىز ءبىر جەردەن شىقسا، سوندا اتاعان ازاماتىمىز پرەزيدەنتتىك سايلاۋدا جەڭىپ شىعادى. وعان كامىل سەنەمىن! سوندىقتان قۇرمەتتى اعايىندار، اتتارى اتالعان ادامدار جۋىق ارادا كەزدەسىپ، ءبىر جاققا شىعايىق! ءبىر ازاماتتى نەمەسە ازاماتشانى قر پرەزيدەنت سايلاۋىنا ۇمىتكەر رەتىندە ۇسىنايىق. ەگەر ءبارىمىز قولداساق، سول ازامات ءبىزدىڭ ەلىمىزدى جاڭا جىلدان باستاپ باسقارادى. سوعان كامىل سەنەمىن! سىزدەر دە سەنىڭىزدەر! العا قازاقستان!”،- دەدى ارمان شوراەۆ.
