Belsendi jáne qoǵam qaıratkeri Arman Shoraev oppozıııa ókilderi men tirkelmegen partııa jetekshilerine Qazaqstandaǵy aldaǵy kezekten tys prezıdenttik saılaýǵa bir kandıdatty tańdaý usynysymen vıdeoúndeý joldady, dep habarlaıdy “Adyrna” ulttyq portaly.
“Asa qurmetti jerlester, otandastar! Kúni keshe ǵana elimizde jeltoqsanda prezıdent saılaýy ótetinin estidik. Jalpy sońǵy 30 jylda bıliktiń atynan saılaý kezekten tys ótetinene úırenip qaldyq. Ol saılaýda kim jeńetinin de aldyn-ala bilip otyratyn boldyq.
Qazir bári ózgerdi. Qańtardan bastap el ózgerdi. Álem ózgerdi. Sony eskersek, menińshe, osy saılaýda bıliktiń senarııinen bólek, ózimizdiń kún tártibimizdi ornatýymyz kerek. Bizdiń elde “men” deı alatyn, “sen tur, men ataıyn” degen basqa myqty azamattar kóp. Namysyn nanǵa aıyrbastamaıtyn azamattar bar. Eldi basqara alatyn azamattar kóp. Biraq sonyń ishinde júzden júırik, myńnan tulpar bir azamatty ózimiz iriktep, saılaýǵa qosýymyz kerek dep oılaımyn”,-dedi ol.
Sondaı-aq, Arman Shoraev birneshe qoǵam belsendisiniń esimin atap, bas qosýǵa shaqyrdy.
“Osy úndeýimiz elimizde “men” deı alatyn azamattarǵa arnalady. Atap aıtsaq, olardyń ishinde Ermurat aǵa Bapı, Bolat Ábilov, Rysbek aǵa Sársenbaev, Muhtar Taıjan, Marǵulan Seısenbaı, Sergeı Dývanov, Toǵjan Qojalı, Dına Elgezek, taǵy da men umyt qaldyrǵan qoǵam belsendileri barlyǵymyz bir jerde jınalyp, bir adamdy osy saılaýǵa kandıdat retinde usynýymyz kerek. Eger bizdiń oıymyz bir jerden shyqsa, sonda ataǵan azamatymyz prezıdenttik saılaýda jeńip shyǵady. Oǵan kámil senemin! Sondyqtan qurmetti aǵaıyndar, attary atalǵan adamdar jýyq arada kezdesip, bir jaqqa shyǵaıyq! Bir azamatty nemese azamatshany QR Prezıdent saılaýyna úmitker retinde usynaıyq. Eger bárimiz qoldasaq, sol azamat bizdiń elimizdi jańa jyldan bastap basqarady. Soǵan kámil senemin! Sizder de senińizder! Alǵa Qazaqstan!”,- dedi Arman Shoraev.
