پاۆلودارلىق كاسىپكەر جەرگىلىكتى ءماسليحات دەپۋتاتى ءبىزدىڭ كومپانياعا قىسىم جاسادى دەپ مالىمدەپ، "Amanat" پارتياسىنىڭ توراعاسى ەرلان قوشانوۆقا ۇندەۋ تاستادى. بۇل تۋرالى "ادىرنا" ۇلتتىق پورتالى جازادى.
"قايىرلى كۇن، قۇرمەتتى ەرلان جاقانۇلى! مەن بەكمۇحاەۆ الماز بەيبىتۇلى. "City Gas Service" جشس پاۆلودار فيليالىنىڭ ديرەكتورىمىن. سىزدەن پاۆلودار قالالىق ءماسليحاتىنىڭ دەپۋتاتى، "Amanat" پارتياسىنىڭ مۇشەسى قوجين قوبىلانبەك نۇرمۇحانۇلىنا قاتىستى شارا قولدانۋىڭىزدى سۇرايمىن. پاۆلودار وبلىسىنىڭ مەملەكەتتىك ورگاندارى تاراپىنان ءبىزدىڭ كومپانياعا ۇزاق ۋاقىت بويىى قىسىم كورسەتىلۋدە. ناتيجەسىندە تابىستى گاز جەلىسى ۇيىمىنا اينالعان "City Gas Service" جشس كومپانياسى جۇمىس ورىندارىن قىسقارتىپ، فيليالدارىن جابۋعا، ايتارلىقتاي شىعىندارعا توزۋگە ءماجبۇر", - دەيدى كاسىپكەر.
الماز بەيبىتۇلىنىڭ ايتۋىنشا، بۇل ماسەلەنىڭ ارتىندا ءماسليحات دەپۋتاتى قوبىلانبەك نۇرمۇحانۇلى تۇر.
"باسەكەلەس "BLUE-STAR.PV" جشس كومپانياسى ء"بىزدىڭ بيزنەسىمىزدى ساتىپ الىڭدار" دەپ ۇسىنىس ءبىلدىرىپ، ءبىزدى ماجبۇرلەي باستادى. ءبىز بۇل ۇسىنىستان ارينە باس تارتتىق. ولاردىڭ ۇسىنىسىنان باس تارتقانىمىز ءۇشىن كومپانيا كەڭسەسىندە، كومپانيا قىزمەتكەرلەرىنىڭ پاتەرلەرىندە بىرنەشە رەت تىنتۋلەر جۇرگىزىلدى. كوممەرتسيالىق قۇپياعا يە قىزمەتتىك قۇجاتتاردى تارتىپ الدى. ويتكەنى «BLUE-STAR.PV» جشس-ءنىڭ قۇرىلتايشىسى دەپۋتات قوجين قوبىلانبەك نۇرمۇحانۇلىنىڭ جۇبايى قوجينا رايحان. ول بۇل كومپانيانى بىزدەن ساتىپ ال دەپ ءوز وكىلدەرىن بىزگە بىرنەشە رەت جىبەرگەن. ايتپەگەندە، ءبىزدىڭ كومپانيانىڭ قىزمەتىن تولىعىمەن توقتاتامىز دەپ ۋادە بەردى. ورىن العان جاعدايعا ەندى شىداي المايمىز. وسىعان قاتىستى شارا قولدانىپ، وسى زاڭسىزدىقتى توقتاتۋىڭىزدى سۇرايمىن", - دەيدى كاسىپكەر الماز بەيبىتۇلى.
