Pavlodarlyq kásipker jergilikti máslıhat depýtaty bizdiń kompanııaǵa qysym jasady dep málimdep, "Amanat" partııasynyń tóraǵasy Erlan Qoshanovqa úndeý tastady. Bul týraly "Adyrna" ulttyq portaly jazady.
"Qaıyrly kún, qurmetti Erlan Jaqanuly! Men Bekmuhaev Almaz Beıbituly. "City Gas Service" JShS Pavlodar fılıalynyń dırektorymyn. Sizden Pavlodar qalalyq máslıhatynyń depýtaty, "Amanat" partııasynyń múshesi Qojın Qobylanbek Nurmuhanulyna qatysty shara qoldanýyńyzdy suraımyn. Pavlodar oblysynyń memlekettik organdary tarapynan bizdiń kompanııaǵa uzaq ýaqyt boıyy qysym kórsetilýde. Nátıjesinde tabysty gaz jelisi uıymyna aınalǵan "City Gas Service" JShS kompanııasy jumys oryndaryn qysqartyp, fılıaldaryn jabýǵa, aıtarlyqtaı shyǵyndarǵa tózýge májbúr", - deıdi kásipker.
Almaz Beıbitulynyń aıtýynsha, bul máseleniń artynda máslıhat depýtaty Qobylanbek Nurmuhanuly tur.
"Básekeles "BLUE-STAR.PV" JShS kompanııasy "bizdiń bıznesimizdi satyp alyńdar" dep usynys bildirip, bizdi májbúrleı bastady. Biz bul usynystan árıne bas tarttyq. Olardyń usynysynan bas tartqanymyz úshin kompanııa keńsesinde, kompanııa qyzmetkerleriniń páterlerinde birneshe ret tintýler júrgizildi. Kommerııalyq qupııaǵa ıe qyzmettik qujattardy tartyp aldy. Óıtkeni «BLUE-STAR.PV» JShS-niń quryltaıshysy depýtat Qojın Qobylanbek Nurmuhanulynyń jubaıy Qojına Raıhan. Ol bul kompanııany bizden satyp al dep óz ókilderin bizge birneshe ret jibergen. Áıtpegende, bizdiń kompanııanyń qyzmetin tolyǵymen toqtatamyz dep ýáde berdi. Oryn alǵan jaǵdaıǵa endi shydaı almaımyz. Osyǵan qatysty shara qoldanyp, osy zańsyzdyqty toqtatýyńyzdy suraımyn", - deıdi kásipker Almaz Beıbituly.
