جامبىل وبلىسىندا بيىل جاستار ساياساتىن جۇزەگە اسىرۋعا 1,4 ميلليارد قارجى قارالدى

705
Adyrna.kz Telegram

جاستاردىڭ ساپالى ءبىلىم الىپ، باسەكەگە قابىلەتتى بولۋى كۇن تارتىبىندەگى نەگىزگى ماسەلەلەردىڭ قاتارىندا. ولاردىڭ ەڭبەك نارىعىنا ارالاسىپ، قوعامدا ءوز ورنىن تابۋعا ۇكىمەت تە بارىنشا جاردەمدەسۋدە. سوعان قاراماستان NEET جاستاردىڭ قاتارى ءالى دە ازايار ەمەس. وبلىس اكىمى نۇرجان نۇرجىگىتوۆتىڭ جاستارىمەن كەزدەسۋىندە وسى باعىتتاعى وزەكتى ماسەلەلەرگە تالقىلانىپ، بەلسەندى، تالاپتى جاستاردىڭ ۇسىنىس-پىكىرلەرى سارالاندى.

جەڭىس ساياباعىندا اشىق اسپان استىندا وتكەن كەزدەسۋگە ايماقتاعى جاستار رەسۋرستىق ورتالىقتارىنىڭ ديرەكتورلارى، جاستار ۇيىمدارىنىڭ كوشباسشىلارى مەن ۆولونتەرلەر دە كەلدى. باسقوسۋدا الدىمەن ءوڭىر باسشىسى نۇرجان مولديارۇلى ءسوز سويلەپ، جاستار ساياساتىن دامىتۋداعى ماسەلەلەر جايىندا كەڭىنەن باياندادى.

– جاستار – ەلىمىزدىڭ بولاشاعى. سوندىقتان جاستاردىڭ ءبىلىمدى، تاربيەلى، باسەكەگە قابىلەتتى بولىپ قالىپتاسۋى اسا ماڭىزدى. بۇل مەملەكەت ساياساتىنىڭ باسىم باعىتتارىنىڭ ءبىرى.

جىل باسىندا وڭىردەگى جاستارعا تالداۋ جاسالىپ، زەردەلەۋ جۇمىستارى جۇرگىزىلدى. سودان بايقاعانىمىز 10 پايىز NEET جاستار ءبىلىم الۋعا جانە جۇمىس ىستەۋگە قۇلىقسىز. بيىل وبلىستا جاستار ساياساتىن جۇزەگە اسىرۋعا 1,4 ميلليارد قارجى قارالدى. بۇل وتكەن جىلمەن سالىستىرعاندا 2 ەسە جوعارى. ەندى بىزگە جاڭا باستامالاردى ىسكە اسىرۋ كەرەك. جاستاردىڭ جاقسى، ۇتىمدى يدەيالارىن ىسكە اسىرۋعا دايىنبىز. ءبىز NEET ساناتىنداعى جاستاردىڭ ۇلەسىن ازايتۋعا بارىنشا كوڭىل بولگەنىمىز ابزال.

 «سەرپىن-2050» جوباسى ارقىلى 1 067 ستۋدەنت وقۋعا ءتۇستى. سول سەكىلدى بيىل جەڭىلدىكپەن باسپانا ءۇشىن نەسيە بەرۋگە ارنالعان «اۋليەاتا جاستارى» باعدارلاماسى ىسكە قوسىلىپ، جەرگىلىكتى بيۋدجەتتەن 500 ميلليون تەڭگە ءبولىندى. ەندى باعدارلاما اياسىندا بيىل 50 جاستى ۇيمەن قامتۋ كوزدەلۋدە. باستاما جاقسى ارينە. بىراق وسى باعدارلاما تۋرالى ەلدىڭ تەرىس كوزقاراسىن قالىپتاستىرماۋىمىز كەرەك. «اسارلاتىن ءۇي سالۋ» جوباسى بويىنشا جىل سايىن جۇزدەن استام الەۋمەتتىك جاعدايى تومەن وتباسىلار ءۇيلى بولۋدا. وسى كۇنگە دەيىن 250-دەن استام جانۇيا بەرەكەلى باستامانىڭ شاراپاتىن كورىپ، قونىس تويىن تويلادى. بيىل دا سول ءۇردىس بويىنشا 117 وتباسىعا اسارلاتىپ ءۇي سالىپ بەرۋ جوسپارلاندى. بۇل يگى جوبالارعا دا مەيلىنشە جاستاردى تارتۋ كەرەك. وڭىردەگى ەرىكتىلەردىڭ، «جاسىل ەل» ەڭبەك جاساعىنىڭ جۇمىستارىنا كۋامىز. بىراق ولاردىڭ جۇمىسى كوزگە كورىنبەيدى. سوندىقتان ەڭبەك جاساعىنا تارتىلعان جاستارعا قالادان 2-3 ساياباق ءبولىپ، سونىڭ تازالىعىن قاداعالاۋدى تاپسىرۋ كەرەك دەپ ويلايمىز. جاستار وسىنداي باياندى باستامالارعا جاۋاپكەرشىلىكپەن قاراسا، ءىس العا باسادى،– دەيدى نۇرجان نۇرجىگىتوۆ.

ايماق  باسشىسى ءوز سوزىندە «ديپلوممەن اۋىلعا» باعدارلاماسىنا، ءدىن ماسەلەسىنە قاتىستى بىرقاتار ماسەلەلەرگە نازار اۋدارتتى.

 وز كەزەگىندە جاستار ساياساتى ماسەلەلەرى باسقارماسىنىڭ باسشىسى سەرىكبول بەرىكقوجا وبلىس اكىمىنىڭ تاپسىرماسىمەن بىراقاتار ناقتى مىندەتتەر بويىنشا جوسپارلار ىسكە اسىرىلىپ جاتقان جۇمىستارعا توقتالدى. ماسەلەن، بۇگىندە باسقارما تاراپىنان 25 مىڭعا جۋىق NEET جاستىڭ جەكە دەرەكتەرى انىقتالىپ، ەلەكتروندى بازاسى ازىرلەنگەن. ەندى سول بازاعا قالا بويىنشا انىقتالماي وتىرعان 3 مىڭعا جۋىق جاس قوسىلسا، جوسپار 100 پايىز ورىندالماق. سونىمەن قاتار، باسقارما باسشىلىعى  تىزىمدەگى 10 مىڭعا جۋىق جاستىڭ ءبىلىم الىپ، ەڭبەك ەتۋگە نيەتتى ەكەنىن انىقتاعان. ەندى باسقارما باسشىلىعى سول جاستاردى وقۋعا ءتۇسىرىپ، گرانت الىپ، جۇمىس ىستەۋگە نيەتتى جاستاردى ەڭبەككە تارتۋعا كوڭىل بولۋدە. بۇل رەتتە جاستار ساياساتى ماسەلەلەرى، جۇمىسپەن قامتۋدى ۇيلەستىرۋ جانە الەۋمەتتىك باعدارلامالار جانە ءبىلىم باسقارمالارى بىرلەسىپ جۇمىس ىستەۋدە.

- «اۋليەتا جاستارى» باعدارلاماسىنىڭ تيىمدىلىگىن ارتتىرىپ، كەلەر جىلعا اۋقىمىن كەڭەيتىپ جالعاستىرۋدى كوزدەپ وتىرمىز. بۇگىندە بەس سالادا ەڭبەك ەتەتىن 600-گە جۋىق جاستان ءوتىنىش ءتۇستى. الداعى ايدا كومميسسيا وتىرىسىن وتكىزىپ، ناقتى مۇقتاج وتباسىلاردىڭ ءتىزىمىن دايىنداپ، 50 جاستى ۇيمەن قامتۋ جوسپاردا بار. وسىلايشا قازان ايىنان تۇرعىن ءۇي كىلتتەرىن تابىستاۋدى باستايمىز. جاستاردى ساياسي-قوعامدىق ومىرگە بەلسەنە تارتۋ بويىنشا دا جۇمىستار ىسكە اسۋدا. جاستار رەسۋرستىق ورتالىقتارىنىڭ فۋنكتسيونالدىق مىندەتتەرىن وزگەرتۋگە كوڭىل بولىنۋدە.

مەملەكەت باسشىسىنىڭ «تاۋەلسىزدىك» جوباسى اياسىندا 7 باعىت بويىنشا 15 جوباعا گرانت ءبولۋدى قاراستىرىپ جاتىرمىز. ءبىز تاۋەلسىزدىك كۇنىنە قاراي وسى گرانتتاردى ۇلەستىرسەك دەپ جوسپارلاپ وتىرمىز. بۇل گرانتتار جاستارعا قاجەتتى ينفراقۇرىلىمداردى دامىتۋعا باعىتتالادى،– دەدى باسقارما باسشىسى.

كەزدەسۋدە «AMANAT» پارتياسى وبلىستىق فيليالى «جاستار رۋحى» جاستار قاناتىنىڭ توراعاسى ۋاليحان بولاتبەك وقۋشىلاردىڭ سپورتقا دەگەن قىزىعۋشىلىعى تومەندەپ بارا جاتقانىنىن جانە قالادا مارافون جارىسىن تاعى ءبىر مارتە وتكىزۋ تۋرالى وي قوستى. سونداي-اق، جاستار رەسۋرستىق ورتالىقتارىنا كوبىرەك قارجى ءبولۋ تۋرالى، ونداعى كادرلىق رەزەرۆ جايىندا بىرنەشە ۇسىنىس تاستادى.

بۇدان سوڭ «جاسىل ەل» جاستار ەڭبەك جاساعى جامبىل وبلىستىق شتابىنىڭ توراعاسى نۇرلان جيەنباي ەڭبەك ماۋسىمىن ءبىر جىلعا دەيىن سوزۋ جانە قوعامدىق كولىكتەرگە جەڭىلدىك قاراستىرىلسا دەگەن تىلەگىن جەتكىزدى.

«AMANAT» پارتياسى وبلىستىق فيليالى «جاستار رۋحى» جاستار قاناتى توراعاسىنىڭ ورىنباسارى ەرعالي ابۋعالي جاستار رەسۋرستىق ورتالىقتارىن جەكەشەلەندىرۋ جاستار ساياساتىن ءىس جۇزىندە شيراتا تۇسەتىنىن ايتىپ وي تاستادى. «اسسامبلەيا جاستارى» قوعامدىق بىرلەستىگىنىڭ مۇشەسى ارتۋر ليگوستاەۆ، وبلىستىق پىكىرسايىس وداعى «ەركىن پىكىر» جاستار قوعامدىق بىرلەستىگىنىڭ مۇشەسى شۇعىلا قىدىرالى جانە وزگە دە جاستار ءوز پىكىرلەرىن ءبىلدىردى.

نۇرجان نۇرجىگىتوۆ جاستاردىڭ ساۋالدارىنا جان-جاقتى جاۋاپتار بەرىپ، بارلىق ۇسىنىستار نازارعا الىناتىن جەتكىزدى.

پىكىرلەر