Jastardyń sapaly bilim alyp, básekege qabiletti bolýy kún tártibindegi negizgi máselelerdiń qatarynda. Olardyń eńbek naryǵyna aralasyp, qoǵamda óz ornyn tabýǵa úkimet te barynsha járdemdesýde. Soǵan qaramastan NEET jastardyń qatary áli de azaıar emes. Oblys ákimi Nurjan Nurjigitovtiń jastarymen kezdesýinde osy baǵyttaǵy ózekti máselelerge talqylanyp, belsendi, talapty jastardyń usynys-pikirleri saralandy.
Jeńis saıabaǵynda ashyq aspan astynda ótken kezdesýge aımaqtaǵy jastar resýrstyq ortalyqtarynyń dırektorlary, jastar uıymdarynyń kóshbasshylary men volonterler de keldi. Basqosýda aldymen óńir basshysy Nurjan Moldııaruly sóz sóılep, jastar saıasatyn damytýdaǵy máseleler jaıynda keńinen baıandady.
– Jastar – elimizdiń bolashaǵy. Sondyqtan jastardyń bilimdi, tárbıeli, básekege qabiletti bolyp qalyptasýy asa mańyzdy. Bul memleket saıasatynyń basym baǵyttarynyń biri.
Jyl basynda óńirdegi jastarǵa taldaý jasalyp, zerdeleý jumystary júrgizildi. Sodan baıqaǵanymyz 10 paıyz NEET jastar bilim alýǵa jáne jumys isteýge qulyqsyz. Bıyl oblysta jastar saıasatyn júzege asyrýǵa 1,4 mıllıard qarjy qaraldy. Bul ótken jylmen salystyrǵanda 2 ese joǵary. Endi bizge jańa bastamalardy iske asyrý kerek. Jastardyń jaqsy, utymdy ıdeıalaryn iske asyrýǵa daıynbyz. Biz NEET sanatyndaǵy jastardyń úlesin azaıtýǵa barynsha kóńil bólgenimiz abzal.
«Serpin-2050» jobasy arqyly 1 067 stýdent oqýǵa tústi. Sol sekildi bıyl jeńildikpen baspana úshin nesıe berýge arnalǵan «Áýlıeata jastary» baǵdarlamasy iske qosylyp, jergilikti bıýdjetten 500 mıllıon teńge bólindi. Endi baǵdarlama aıasynda bıyl 50 jasty úımen qamtý kózdelýde. Bastama jaqsy árıne. Biraq osy baǵdarlama týraly eldiń teris kózqarasyn qalyptastyrmaýymyz kerek. «Asarlatyn úı salý» jobasy boıynsha jyl saıyn júzden astam áleýmettik jaǵdaıy tómen otbasylar úıli bolýda. Osy kúnge deıin 250-den astam januıa berekeli bastamanyń sharapatyn kórip, qonys toıyn toılady. Bıyl da sol úrdis boıynsha 117 otbasyǵa asarlatyp úı salyp berý josparlandy. Bul ıgi jobalarǵa da meılinshe jastardy tartý kerek. Óńirdegi eriktilerdiń, «Jasyl el» eńbek jasaǵynyń jumystaryna kýámiz. Biraq olardyń jumysy kózge kórinbeıdi. Sondyqtan eńbek jasaǵyna tartylǵan jastarǵa qaladan 2-3 saıabaq bólip, sonyń tazalyǵyn qadaǵalaýdy tapsyrý kerek dep oılaımyz. Jastar osyndaı baıandy bastamalarǵa jaýapkershilikpen qarasa, is alǵa basady,– deıdi Nurjan Nurjigitov.
Aımaq basshysy óz sózinde «Dıplommen aýylǵa» baǵdarlamasyna, din máselesine qatysty birqatar máselelerge nazar aýdartty.
Óz kezeginde jastar saıasaty máseleleri basqarmasynyń basshysy Serikbol Berikqoja oblys ákiminiń tapsyrmasymen biraqatar naqty mindetter boıynsha josparlar iske asyrylyp jatqan jumystarǵa toqtaldy. Máselen, búginde basqarma tarapynan 25 myńǵa jýyq NEET jastyń jeke derekteri anyqtalyp, elektrondy bazasy ázirlengen. Endi sol bazaǵa qala boıynsha anyqtalmaı otyrǵan 3 myńǵa jýyq jas qosylsa, jospar 100 paıyz oryndalmaq. Sonymen qatar, basqarma basshylyǵy tizimdegi 10 myńǵa jýyq jastyń bilim alyp, eńbek etýge nıetti ekenin anyqtaǵan. Endi basqarma basshylyǵy sol jastardy oqýǵa túsirip, grant alyp, jumys isteýge nıetti jastardy eńbekke tartýǵa kóńil bólýde. Bul rette jastar saıasaty máseleleri, jumyspen qamtýdy úılestirý jáne áleýmettik baǵdarlamalar jáne bilim basqarmalary birlesip jumys isteýde.
- «Áýlıeta jastary» baǵdarlamasynyń tıimdiligin arttyryp, keler jylǵa aýqymyn keńeıtip jalǵastyrýdy kózdep otyrmyz. Búginde bes salada eńbek etetin 600-ge jýyq jastan ótinish tústi. Aldaǵy aıda kommıssııa otyrysyn ótkizip, naqty muqtaj otbasylardyń tizimin daıyndap, 50 jasty úımen qamtý josparda bar. Osylaısha qazan aıynan turǵyn úı kiltterin tabystaýdy bastaımyz. Jastardy saıası-qoǵamdyq ómirge belsene tartý boıynsha da jumystar iske asýda. Jastar resýrstyq ortalyqtarynyń fýnkıonaldyq mindetterin ózgertýge kóńil bólinýde.
Memleket basshysynyń «Táýelsizdik» jobasy aıasynda 7 baǵyt boıynsha 15 jobaǵa grant bólýdi qarastyryp jatyrmyz. Biz Táýelsizdik kúnine qaraı osy granttardy úlestirsek dep josparlap otyrmyz. Bul granttar jastarǵa qajetti ınfraqurylymdardy damytýǵa baǵyttalady,– dedi basqarma basshysy.
Kezdesýde «AMANAT» partııasy oblystyq fılıaly «Jastar rýhy» Jastar qanatynyń tóraǵasy Ýalıhan Bolatbek oqýshylardyń sportqa degen qyzyǵýshylyǵy tómendep bara jatqanynyn jáne qalada marafon jarysyn taǵy bir márte ótkizý týraly oı qosty. Sondaı-aq, jastar resýrstyq ortalyqtaryna kóbirek qarjy bólý týraly, ondaǵy kadrlyq rezerv jaıynda birneshe usynys tastady.
Budan soń «Jasyl El» jastar eńbek jasaǵy Jambyl oblystyq shtabynyń tóraǵasy Nurlan Jıenbaı eńbek maýsymyn bir jylǵa deıin sozý jáne qoǵamdyq kólikterge jeńildik qarastyrylsa degen tilegin jetkizdi.
«AMANAT» partııasy oblystyq fılıaly «Jastar rýhy» Jastar qanaty tóraǵasynyń orynbasary Erǵalı Ábýǵalı jastar resýrstyq ortalyqtaryn jekeshelendirý jastar saıasatyn is júzinde shırata túsetinin aıtyp oı tastady. «Assambleıa jastary» qoǵamdyq birlestiginiń múshesi Artýr Lıgostaev, oblystyq pikirsaıys odaǵy «Erkin pikir» jastar qoǵamdyq birlestiginiń múshesi Shuǵyla Qydyráli jáne ózge de jastar óz pikirlerin bildirdi.
Nurjan Nurjigitov jastardyń saýaldaryna jan-jaqty jaýaptar berip, barlyq usynystar nazarǵa alynatyn jetkizdi.
