بۇگىندە جابىق مەكەمەلەردە جازاسىن وتەۋشى ازاماتتاردى جۇمىسپەن قامتۋ جۇيەلى جولعا قويىلعان. بۇل باعىتتا قاج مەكەمەلەرى ءتۇرلى كاسىپورىندارمەن كەلىسىمگە كەلىپ، جەرگىلىكتى اتقارۋشى بيلىكپەن تىعىز قارىم-قاتىناستا جۇمىس ىستەۋدە. دەسە دە، سوت ۇكىمىمەن كىنالى دەپ تانىلعانداردى جۇمىسپەن قامتۋدا «بارماق باستى، كوز قىستى» ارەكەتتەر بولماۋى ءتيىس. ءبىر سوزبەن ايتقاندا، مۇندا جەڭ ۇشىنان جالعاسقان جەمقورلىققا جول بەرىلمەۋى قاجەت-اق.
وڭىرلىك قاج دەپارتامەنتىندە وتكەن باسقوسۋ بارىسىندا وسىناۋ وزەكتى ماسەلە كەڭىنەن تالقىعا ءتۇستى. جيىنعا قر سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنتىنىڭ پرەۆەنتسيا باسقارماسىنىڭ باس مامانى ايبەك اجيباەۆ، وبلىستىق پوليتسيا دەپارتامەنتى وزىندىك قاۋىپسىزدىك باسقارماسىنىڭ اعا جەدەل ۋاكىلى ايدىن قوراباەۆ سونداي-اق قاج دەپارتامەنتىنىڭ باسشى قۇرامى مەن جد-158/1,2,4,5,7 مەكەمە باستىقتارىنىڭ ورىنباسارلارى، اتالعان مەكەمەلەردەگى سوتتالعانداردىڭ ەڭبەگىن ۇيىمداستىرۋ قىزمەتىنىڭ ءبولىم باسشىلارى مەن اعا قىزمەتكەرلەرى، «ەڭبەك-تاراز» رمك فيليالىنىڭ ديرەكتورى جانە ءوندىرىس ورىندارىنىڭ شەبەرلەرى، شاعىن جانە ورتا بيزنەس وكىلدەرى قاتىستى.
باسقوسۋدا الدىمەن وڭىرلىك قاج دەپارتامەنتى سوتتالعانداردىڭ ەڭبەگىن ۇيىمداستىرۋ توبىنىڭ باس مامانى ادىلەت پودپولكوۆنيگى ايمەن تايتەليەۆا بايانداما جاسادى. ايمەن اقىلبەكقىزى ءوز سوزىندە قاج قىزمەتكەرلەرىنىڭ ىقپالىمەن بۇل كۇندە سوتتالعان ازاماتتار اقىلى جۇمىسپەن قامتىلعانىن ءارى ولاردىڭ مەملەكەت جانە جابىرلەنۋشىلەر الدىنداعى قارىزدارى كەزەڭ-كەزەڭىمەن وتەلىپ جاتقاندىعىن جەتكىزدى. جيىندا سونداي-اق جەكە كاسىپكەرلەر، جشس وكىلدەرى ءوز تاراپتارىنان كاسىپتەرىن ودان ءارى ۇلعايتۋعا قانداي كومەكتەر الۋعا بولاتىندىعى جونىندە كوكەيدەگى سۇراقتارىن قويىپ، تۇششىمدى جاۋاپ الدى. قىسقاسى، بۇل كۇنى جينالعاندار پارا بەرمەي-اق پايدالى ءىس ىستەۋگە بولادى دەگەن تۇجىرىمدا تارقاستى. سول سەبەپتى، بۇل باعىتتا بىرلەسە جۇمىس ىستەيمىز دەپ ۋاعدالاستى.
