دەنساۋلىق سالاسىنىڭ بىلىعى الداعى ءبىر جيىرما جىلدا دۇرىس شەشىمىن تاپپاسىنا جۇرتتىڭ پىكىرلەرىنەن كوز جەتكىزدىم. نەشە ءتۇرلى سۇمدىق بولىپ جاتىر ەكەن عوي.
ءبىزدىڭ قىزىمىزدىڭ ءبىر بۇيرەگىن كىشكەنتاي كەزىندە الىپ تاستاعان. نەگىزى ءبىر بۇيرەكپەن مۇگەدەكتىك تاعايىندالۋى كەرەك. جانە جارتى جىل سايىن تەكسەرىلىپ، ەم الىپ تۇرۋى كەرەك. بىراق "قۇرسىن قويشى" دەي بەرەتىن قازاقپىز، "قۇرسىن، قۇداي جار بولسىن" دەپ مۇگەدەك دەگەن اتى اۋلاق دەپ، سونى راسىمدەۋدى جايىنا قويا سالدىق. وعان قوسا الگى ءارى-بەرى جۇگىرىستەن شارشادىق. قۇددى الىپ تاستاعان بۇيرەك كەلەسى جىلى قايتا ءوسىپ كەتەتىن سياقتى جىل سايىن بۇيرەگىڭ جوق ەكەنىن دالەلدەۋىڭ كەرەك. تۇقىمى قۇرسىن، ونى دالەلدەپ بىتەمىن دەگەنشە، الەمدەگى ەڭ سورلى ادام بولىپ كەتەسىڭ. وعان قوسا، سول ءبىر "ۇكىمەتتىڭ بەرەتىن بەس تيىنىنا بولا قايىرشىلانىپ" جۇگىرىپ جۇرگەنىڭ ءۇشىن اياپ قارايتىن كوزدەر بار. تازا كەمسىتىپ تۇرادى عوي. بالا باقىلاۋدا بولسىن دەپ جۇگىرىپ ءجۇر-اۋ دەگەن وي ميىنا دا كىرىپ شىقپادى عوي ەشكىمنىڭ.
بىزدىكى شۇكىر، ال اۋرۋ ەكەنى سىرت كوزگە كورىنىپ تۇراتىن اتا-انالاردى، بالالاردى كەمسىتۋ تۋرالى ايتپاي-اق قويسا دا بولادى. الەۋمەتتىك جەلىدەن كومەك سۇراعان بالالارعا از دا بولسا اقشا سالىپ تۇراتىن ەدىم، قازىر ونىڭ ءوزىن كۇماندانىپ اۋداراتىن بولدىق. سەبەبى قىمباتشىلىق كادىمگىدەي قالتانى تىقىرلاتىپ بارا جاتىر.
ال جۇيەلەنەيىن دەگەن دەنساۋلىق سالاسى جوق. ەرتەڭ اتامىزعا كورونوگرافيا جاساتۋ ءۇشىن پورتالعا قويۋعا قۇجات جيناۋدى باستايمىز. قانداي جولداردان وتەرىمىزدى ەلەستەتىپ وتىرعان بولارسىزدار. حالىقتىڭ دەنساۋلىعى ناشار، وتە ناشار. كەيبىرەۋلەر "قاتتى اۋىرعاندا جەدەل جاردەم الادى عوي" دەپ قويادى. قاتتى اۋىرۋعا جەتكىزبەي ەمدەلۋگە بولماي ما؟ حالىق زار ەڭىرەپ وتىر، ەستيتىن ۇكىمەت كەرەڭ.
