قىتايلار قازاقستاندا ءوز مەكتەبىن اشقانىن بىلەسىز بە؟

3288
Adyrna.kz Telegram

الماتىدا قازاقستانداعى قىتاي ەلشىلىگىنىڭ قولداۋىمەن «ءۇمىت» اتتى قازاقستانداعى قىتاي ازاماتتارىنا ارنالعان مەكتەپ اشىلدى. 2 قىركۇيەكتە مەكتەپتىڭ اشىلۋ سالتاناتىنا قاتىسقان قىتاي باس كونسۋلى گو تسين تسياۋ ءسوز سويلەگەن. بۇل تۋرالى قىتاي باس كونسۋلدىعىنىڭ ەلەكتروندى گازەتى حابارلايدى دەپ جازادى arasha.kz.

«قىتاي سان مىڭجىلدىق مادەنيەتكە يە ەل. ونىڭ تاريحى تىم تەرەڭدە جاتىر. بۇل قىتاي ۇرپاقتارىن بىرىكتىرەتىن كۇش. قىتاي مادەنيەتى ءوز ءداستۇرىنىڭ ۇرپاق ساباقتاستىعىنىڭ ارقاسىندا الەم مادەنيەتىنىڭ ىشىندەگى ومىرشەڭدىككە يە. قىتاي ازاماتتارى قاي جەردە جۇرسە دە ءداستۇرىن، مادەنيەتىن ۇيرەنىپ، ءوز جۇرەكتەرىندەگى وتانشىلدىق رۋحىن جوعالتپاۋى ءتيىس. سول ارقىلى تامىرىن تەرەڭگە جايۋ كەرەك. بۇل مەكتەپتىڭ جۇمىسى قازاقستانداعى جانە وزگە شەتەلدەردەگى قىتاي كاسىپورىندارىنىڭ، قىتاي مەكەمەلەرىنىڭ سونداي-اق قىتاي كاسىپكەرلەرىنىڭ قولداۋىمەن ءبىر جىلدان بەرى جۇمىس ىستەپ كەلەدى. سول ارقىلى قوعامدىق ىقپالى دا كەڭەيدى. مەكتەپتە وقىعان بالالار قىتاي مادەنيەتىن بويىنا ءسىڭىرىپ، ءوز وتاندارىنا سۇيىسپەنشىلىگىن تەرەڭدەتىپ، «قىتاي ارمانىن» جۇزەگە اسىرۋعا كۇش سالادى. جانە دە ولار قازاقستان مەن قىتاي اراسىنداعى دوستىققا التىن كوپىر بولىپ، «ءبىر بەلدەۋ – ءبىر جول» ەكونوميكالىق جوباسىنىڭ نەگىزگى اتقارۋشىلارىنا اينالادى. مەكتەپتىڭ تۇلەكتەرى ارقىلى جەرگىلىكتى جاستار قىتايدى تۇسىنە الار دەپ ۇمىتتەنەمىن»، – دەپتى قىتاي باس كونسۋلى گو تسين تسياۋ.

الماتىداعى مەكتەپتىڭ اشىلۋ سالتاناتىندا مەكتەپ وقۋشىلارى قىتاي مادەنيەتىنەن، قىتاي اندەرىنەن، قىتاي بيىنەن كونتسەرتتىك باعدارلاما قويعان. شاراعا قازاقستانداعى قىتاي بانكى، قىتاي ونەركاسىپ بانكى، قىتاي مۇناي-گاز كومپانيالارىنان جانە باسقا قىتايلىق مەكەمەلەردەن الپىستان استام ادام قاتىسقان، دەپ جازادى "قازاق ءۇنى" گازەتى arasha.kz. -عا سىلتەمە جاساي وتىرىپ.

پىكىرلەر