قاڭتاردا مەملەكەت باسشىسى قاسىم-جومارت توقاەۆتىڭ باستاماسىمەن «قازاقستان حالقىنا» اتتى قور قۇرىلىپ، قالتالى ازاماتتار اقشا اۋدارا باستاعان ەدى. مىنە، سودان بەرى قور اتاۋلى كومەك كورسەتۋ جانە دامۋ باعدارلاماسىن ىسكە اسىرۋ باعىتىندا جۇمىس ىستەپ كەلەدى. بۇگىندە قوردان كومەك سۇراعانداردىڭ ىشىندە ازقامتىلعان جانە كوپبالالى وتباسىلار كوپ. دەگەنمەن، قور ەڭ الدىمەن ەرەكشە قاجەتتىلىگى بار بالالاردىڭ اياققا تۇرىپ كەتۋىنە بارىنشا ىقپالداسۋدا. بۇل راسىندا بالالار جىلى قارساڭىندا قولعا الىنعان يگى شارپالاردىڭ بىرەگەيى.
بۇل تۋرالى وبلىسقا جۇمىس ساپارىمەن كەلگەن «قازاقستان حالقىنا» قوعامدىق قورى توراعاسىنىڭ ورىنباسارى ءلاززات شىڭعىسباەۆا ايرىقشا اتاپ ءوتىپ، قوردىڭ جوبا-جوسپارى، باعىتى تۋرالى كەڭىنەن ايتىپ بەردى.
جالپى وبلىستا ەرەكشە ءبىلىم الۋدى قاجەت ەتەتىن 7898 بالا بولسا، ونىڭ ىشىندە 2786 بالانىڭ مۇمكىندىگى شەكتەۋلى. ايماقتاعى 444 مەكتەپتە 1262 بالا ينكليۋزيۆتى بىلىممەن قامتىلعان. سول سەكىلدى 4 ارنايى تۇزەتۋ مەكتەپ ينتەرناتىندا 501 بالاعا قىزمەت كورسەتىلۋدە.
باسقوسۋدا وبلىس اكىمى نۇرجان نۇرجىگىتوۆ وڭىردەگى ەرەكشە قاجىلەتتىلىگى بار جاستار تۋرالى توقتالدى.
– وبلىستا ەرەكشە ءبىلىم مەن تاربيەنى قاجەت ەتەتىن بالالار ءۇشىن جوبالار ازىرلەنۋدە. اتاپ ايتقاندا مەكتەپتەن تىس جانە مەكتەپشىلىك وليمپيدالار وتكىزەتىن وبلىستىق ورتالىقتى قايتا جاڭعىرتىپ، ەرەكشە قاجەتتىلىگى بار بالالاردى سول ورتالىقتا بەيىمدەۋ جوسپارلانۋدا. اتالعان ورتالىقتا 1500 جانە 100 ورىندىق جاتاقحانا ءۇشىن قوسىمشا عيمارات قاراستىرىلۋدا. سونداي-اق تاراز قالاسىندا اۋتيزم جانە وڭالتۋ ورتالىعىنا قوسىمشا عيمارات پەن جاتاقحانانىڭ جوبالىق سمەتالىق قۇجاتتارىن ازىرلەۋ بويىنشا جۇمىستار جۇرگىزىلۋدە. بۇل جوبالاردىڭ قۇنى 1 ميلليارد تەڭگەنى قۇراماق. وسىعان وراي اتالعان ماسەلەلەردى قور تاراپىنان شەشۋدى ۇسىنامىز،–دەدى وبلىس اكىمى.
بۇدان سوڭ «قازاقستان حالقىنا» قوعامدىق قورى توراعاسىنىڭ ورىنباسارى ءلاززات شىڭعىسباەۆا قوردىڭ الداعى جوبالارى مەن باعدارلامالارى جانە 6 ايداعى جۇمىس اۋقىمى تۋرالى باياندادى.
– قور رەسمي تىركەلگەن كۇنى-اق جۇمىسىن باستاپ كەتتى. سول كۇننەن ۇكىمەتتىك ەمەس ۇيىمدارمەن كەزدەسۋلەر وتكىزىپ تۇرامىز. ەلىمىزدە 25 مىڭنان استام ۇكىمەتتىك ەمەس ۇيىمدار بولسا، ونىڭ ىشىندە مىڭعا تارتا ۇيىم بەلسەندى جۇمىس ىستەيدى. قورعا ەل بويىنشا 40 مىڭعا جۋىق ازامات ءوتىنىش تاستاسا، سونىڭ 1800-دەن استامى جامبىل وبلىسىنان تۇسكەن. ءبىز سول وتىنىشتەردى جىك-جىككە ءبولىپ، سارالاپ قارادىق. ايتقىم كەلگەنى، قوردىڭ اقشاسىنا نەسيە جابىلمايدى جانە توي تومالاققا كومەك سۇراعاندارعا كومەك كورسەتىلمەيدى. كومەك تەك شىن مۇقتاج جاندارعا كورسەتىلەدى. ءبىز اۋەلى قۇقىق قورعاۋ ورگاندارىنىڭ قاتارىندا ءجۇرىپ، وقىستان قازا تاپقان ازاماتتاردىڭ وتباسىنا 7 ميلليون تەڭگەدەن اۋداردىق. سول سەكىلدى اۋىر جارالانعان ازاماتتاردىڭ وتباسىنا دا قارجىلاي كومەك كورسەتىلدى. ەلدەگى جوو ءبىلىم الاتىن تومەن وتباسىدان شىققان ستۋدەنتتەرگە گرانت بەرىلۋدە. ولاردىڭ باسىم كوپشىلىگى تۇرمىس جاعدايىنا بايلانىستى ۇلگەرىمى ناشارلاعان ستۋدەنتتەر. سول سەكىلدى دەنساۋلىق ساقتاۋ سالاسىندا تۋعاننان كورۋ قابىلەتىنەن اجىراعان نارەستەلەردىڭ ەمىنە، تىرەك-قيمىل اپپاراتى زاقىمدانعان بالالارعا جاردەمدەسۋدەمىز.
بۇدان وزگە تامىر پوتولوگياسى بويىنشا سىرقاتتانعان بالالاردىڭ دا ءوتىنىشىن قۋاتتاپ وتىرمىز. كەيىنگى جىلدارى اۋتيزممەن اۋىراتىن بالالار دا كوبەيىپ كەلەدى. سوندىقتان ءبىز سەگىز وڭىردە رەابەليتاتسيالىق ورتالىق اشۋدى جوسپارلاپ وتىرمىز. سول ورتالىقتىڭ ءبىرى تاراز قالاسىندا اشىلادى. بىزدە مەديتسينا سالاسىنداعى تاجىريبەلى ماماندار كوپتەگەن اۋرۋدى ەمدەۋگە قاۋقارلى. سوندىقتان رەابەليتتسيالىق ورتالىقتاردا قىزمەت كورسەتۋ ساپاسىنا ەۆروپاداعى ەلدەر سەكىلدى ايرىقشا كوڭىل بولگەنىمىز ءجون،–دەدى ءلاززات التىنبەكقىزى.
دوڭگەلەك ۇستەل وتىرىسىندا قوعام بەلسەندىلەرى قور باسشىلىعىنا اشىق سۇراق قويىپ ماردىمدى جاۋاپ الدى.
جيىندا ءوڭىر باسشىسى اۋىلدىق جەردەگى ءبىلىم ساپاسىن قالا دەڭگەيىن جەتكىزۋ ماسەلەسىن قاۋزاپ، قوردىڭ وسى جۇمىستارعا ارالاسقانىنا ريزاشىلىعىن ءبىلدىردى. نۇرجان نۇرجىگىتوۆ قوردىڭ كومەگىمەن جىل سايىن ءبىر اۋداندا مەكتەپ اشىپ، مۇعالىمدەردى ارنايى وقۋدان وتكىزۋ ماسەلەسى قولعا الۋ تۋرالى دا ۇسىنىسىن ءبىلدىردى.
كەزدەسۋ سوڭىندا جامبىل وبلىسىنىڭ اكىمى مەن «قازاقستان حالقىنا» قورى توراعاسىنىڭ ورىنباسارى ءوزارا ىنتىماقتاستىق تۋرالى مەموراندۋمعا قول قويدى.
