جامبىل وبلىسىندا «ءمولدىر بۇلاق» وقۋ-ساۋىقتىرۋ ورتالىعى اشىلدى

1631
Adyrna.kz Telegram

مەملەكەت باسشىسى قاسىم-جومارت توقاەۆتىڭ تاپسىرماسىمەن جامبىل وبلىسىنداعى رەزيدەنتسيا عيماراتى «ءمولدىر بۇلاق» وقۋ-ساۋىقتىرۋ ورتالىعى بولىپ قايتا اشىلدى.

بالالار يگىلىگىنە نەگىزدەلگەن ورتالىقتىڭ سالتاناتتى اشىلۋىنا كوپشىلىكپەن بىرگە جامبىل وبلىسىنىڭ اكىمى نۇرجان نۇرجىگىتوۆ، قر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى توراعاسىنىڭ ورىنباسارى باتىرحان جولداس قاتىسىپ، ءوز قۇتتىقتاۋلارىن ءبىلدىردى.

قوناقتار الدىمەن ورتالىقتىڭ اللەياسىندا ازىرلەنگەن بالالاردىڭ قولونەر، سۋرەت كورمەلەرىمەن تانىسىپ، ءتۇرلى سپورتتىق شارالارىن جانە كونتسەرتتىك باعدارلامالارىن تاماشالادى.

وبلىس اكىمى ءوز سوزىندە ەل ەرتەڭى – بۇگىنگى بالالارعا بارىنشا كوڭىل ءبولۋ، قولداۋ، جاعداي جاساۋ – مەملەكەت ساياساتىنىڭ باسىم باعىتتارىنىڭ ءبىرى ەكەندىگىن اتاپ ءوتتى.

- ەل پرەزيدەنتىنىڭ «ادىلەتتى قازاقستان: ءبارىمىز جانە ارقايسىمىز ءۇشىن. قازىر جانە ءاردايىم» سايلاۋالدى باعدارلاماسىن ىسكە اسىرۋ ماقساتىندا وبلىسىمىزدا اۋقىمدى جۇمىستار اتقارىلۋدا. باعدارلامادا رەسپۋبليكا بويىنشا «50 بالالار ساۋىقتىرۋ لاگەرىن قۇرۋ» مىندەتى كوزدەلگەن.

وسى ورايدا، مەملەكەت باسشىسى 5 وڭىردەگى رەزيدەنتسيانى بالالاردىڭ يگىلىگىنە بەرۋدى تاپسىرعان بولاتىن. اتالعان تاپسىرما اياسىندا بۇگىن مىنە «ءمولدىر بۇلاق» وقۋ-ساۋىقتىرۋ ورتالىعىنىڭ اشىلۋ سالتاناتىنىڭ كۋا بولىپ وتىرمىز.

نىسان – جىل بويى جۇمىس جۇرگىزەتىن ايماقتاعى العاشقى وقۋ-ساۋىقتىرۋ ورتالىعى.

بالالار بۇل ورتالىققا جاز مەزگىلىندە 12 كۇندىك، باسقا كەزەڭدەردە 24 كۇندىك ساۋىقتىرۋمەن قامتىلاتىن بولادى.

بۇل باستاما – مەملەكەت تاراپىنان بالالاردىڭ بولاشاعى ءۇشىن جاساعان قامقورلىعى.

بالالاردىڭ بولاشاعى مەن دەنساۋلىعى – مەملەكەت ءۇشىن نەگىزگى باسىمدىقتاردىڭ ءبىرى. بولاعاشاعىنان ءۇمىت كۇتتىرەتىن بالالاردىڭ بىرقاتارى وسى ورتالىقتىڭ العاشقى قارلىعاشتارى اتانعالى تۇر دەپ سەنەمىن.

بارشاڭىزدى بۇگىنگى قۋانىشتى ساتپەن شىن جۇرەكتەن قۇتتىقتايمىن،-دەدى نۇرجان نۇرجىگىتوۆ.

ءوز كەزەگىندە قر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى توراعاسىنىڭ ورىنباسارى باتىرحان جولداس، وبلىستىق اتا-انالار قوعامدىق كەڭەسىنىڭ توراعاسى رينات نۇراقباەۆ تا ىزگى لەبىزىن جەتكىزدى.

بۇدان سوڭ كوپشىلىك نازارىنا كونتسەرتتىك باعدارلاما ۇسىنىلىپ، «ءمولدىر-بۇلاق» وقۋ-ساۋىقتىرۋ لاگەرىنىڭ تۋى كوتەرىلدى. قوناقتار ورتالىقتى ارالاپ، جاعدايىمەن تانىستى.

ايتا كەتەيىك، اۋماعى 10 گەكتاردى قۇرايتىن ورتالىقتا بالالاردىڭ دەمالىسى ءۇشىن بارلىق جاعداي جاسالىنعان. اتاپ ايتقاندا، زاماناۋي قۇرال-جابدىقتارمەن قامتىلعان وقۋ كابينەتتەرى، سپورت الاڭشالارى مەن ۇيىرمە بولمەلەرى، 5 مەزگىل ىستىق تاماقپەن قامتاماسىز ەتىلەتىن ارنايى اسحانا قاراستىرىلعان.

سونداي-اق، ورتالىق اۋماعىندا بالالاردىڭ سەرۋەندەپ، تىنىس الۋىنا ارنالعان شاعىن توعاي بار.

لاگەردىڭ ءار كەزەڭىندە تاراز قالاسى مەن 10 اۋداننىڭ بەسىنشى جانە توعىزىنشى سىنىپ ارالىعىنداعى 50 وقۋشىدان دەمالادى. ونىڭ ىشىندە، ينكليۋزيۆتى بالالارعا دا ايرىقشا نازار اۋدارىلادى.

بالالار بۇل ورتالىقتا جاز مەزگىلىندە 12 كۇندىك، باسقا كەزەڭدەردە 24 كۇندىك ساۋىقتىرۋمەن قامتىلادى.

جالپى، بيىلعى جاز مەزگىلىندە وبلىستاعى 9 ساۋىقتىرۋ لاگەرىندە 9 014 بالا دەمالۋدا.

پىكىرلەر